Aizawl South-III Assembly bial huamchhung Muallungthu Polling Station-a vote thlak a ngaih chhana mawhphurtu bera ngaih, presiding officer chu dan a bawhchhiat dan chhuichian a nih chhungin sawrkara a hna atangin chawlhtir a ni.
Presiding officer (PRO) hi Agriculture deputy director ni lai a ni a. Hemi chungchanga Agriculture secretary-in ziaka a hriattirnaah, hna atanga chawlhtir lailawk a nih chhan chu Muallungthu P/S a dik lo taka a thiltih avanga Election Commission of India thupek anga tih a ni tih a tarlang a. A thiltih nia puh hi Agriculture department chuan a chhuichiang (departmental proceedings) dawn a, official duty tih that loh avang leh document a phuahchawp (fabricate) vanga hremna lek tura kalpui ta a ni tih a tarlang bawk.
Tarlan tawh thin angin, November 7-a Mizorama inthlanpui neih a nih hma khan Muallungthu P/S-a EVM hman turah hian EVM hman dan inzirtirna atan hmeh chhin theih hun ‘mock poll’ siam a ni a. Heta hmeh chhin hi paih (clear) leh tur a nih laiin, paih loin inthlan ni ah khan hman zui a ni a, he polling station-a vote nei zat aia tam daihin vote an thlak niin a lang ta a ni.
Thudawn danin, polling station-a vote awm zat aia tam vote tla ta hi thup tumin PRO hian a chunglama thuneitute hriattir loin polling station-a vote awm zat chu a ziah belh a. Vote nei hming (signature) lem a ziah chu manchhuah a ni ta a ni.
Thudawnna chuan, mock poll-a vote ho paih a ni lo tih hriatchhuah hlim khan thuneitu sang lam hrilhhria nise, chumi siamrem dan tur chu ngaihtuah leh mai theih a nih dawn laiin, chutianga ti loa dan bawhchhe zawnga a che nia lang khan chawlh lailawk tir hial a tawh chhan a nih a rinawm tih a sawi.
He officer hi a hna atanga chawlhtir lailawk leh, chhuichian a nih chhungin a awm mekna – Aizawl chu thuneitute remtihna lo chuan chhuahsan lo tura tih a ni a. A hna atanga chawlh lailawk tir a nih chhung hian a hlawh chanve a la dawn a ni.
Muallungthu P/S repoll ngaih chhan PRO suspend
