Sericulture department hnuaia Muga pangang (Muga Silkworm) chi siamna hmunpui, Government Muga Grainage Centre Durtlanga hmalakna chu Zirtawpni khan Sericulture minister Er. Lalrinawma’n a enfiah.
Minister chuan sericulture kaltlanga thil dehchhuah chu a hralhna kawnga buaina awm lo a nih bakah kan ram sik leh sa mil zawng tak a nih thu a sawi a. Tam zawk thar thei turin pangang khawitu kan pun zel a ngai a, a thatna vawrhlar leh inzirtir kawngah tan lak a tul, tih a sawi.
Muga pangang khawi hmanga eizawnna hlawhtling taka kalpui turin Mizoramin theihna nasa tak a neih thu leh state dangte ngaihven a a nih tawh thu a sawi a. Department hnuaia thawktute chu pangang khawitute chawikan leh puih kawnga tan la zel turin a fuih.
Sericulture mithiamte sawi danin, Muga pangang hi khawvelah India hmarchhak state-ah chauh hian an awm thei a. Tun dinhmunah Muga pangang, seed cocoon man hi a chi tur atana lei chuan pakhat Rs.3 a ni a, la duang tur atana lei chuan Rs. 1.90 a ni. Muga pangang tui kg. khat hi Rs. 14000 niin, Muga silk la duang kg khat hi Rs. 28000 vel a ni.
Mizoramah Muga pangang hi a ram tla a awm nual a, Bul leh Nauthak hnahte hi an chaw a ni. Heng thingkung hi Mizoram hmun tinah hmuh tur a awm. Hmarchhak phai khaw lumah nipui laiin Muga pangang khawi hi an hlawhchham pui thin a, Mizoramah erawh tha takin khawlum lai pawhin khawi hlawhtlin thin a ni a, kuminah pawh hlawhtling taka khawi niin, cocoon thar chhuahte hi a chi tur atan siam mek a ni.
Central Silk Board pawhin Mizoram sik leh sa that dan hriain Muga pangang chi siam programme an kalpui a, tun tumah hian pangang tui engemawzat tharchhuah theih beisei a ni. Heng pangang tui thar chhuah hi Mizorama pangang khawitute tana duan a nih bakah phailam atanga ngenna a a awm nual bawk avangin, thawn chhuak tura inruahman a ni. Sericulture department leh Mizoram University chuan kumin August 4 khan sericulture tih hmasawnna lam hawi thawhdunna thuthlung (MoU) an ziak a ni.
Muga pangang khawina hmun tlawh
