Mizoram sawrkarin Mizoram Universal Health Care Scheme hnuaia inziaklut tana an damdawi in awm man leh damdawi hman mana a sen chu cheng nuai 6900 a tling tawh. Health & Family Welfare minister Lalrinpuii sawi danin, sawrkar flagship programme – Mizoram Universal Health Care Scheme (MUHCS) hnuaia mahni pawisa seng loa an inenkawl theihnaah tun thlengin damlo mi 46064 inenkawlna bill chu damdawi in hnenah sawrkarin a peksak tawh a; hemi atana sawrkar sum sen zat chu cheng nuai 6948 a tling tawh a, phai lama refer mi 2818 an awm tawh tih a sawi. Mizorama empanelled private hospital 11, day care centre 3, phai lama empanelled hospital 25 leh Mizorama sawrkar hospital zawng zawng nen tangrualin mipui damlo enkawl turin sawrkarin tan a la tih a sawi a ni.
Hetihlai hian sawrkarin mipui laka a intiamna a tihhlawhtlin tawh, ‘ruang phurh’ a buaipui mekah tun thlengin thingtlang mi harsa zawk 1445 ruang chu an in lumah thlensak a nih tawh a, hemi atan hian sawrkar chuan cheng nuai 150.57 a seng tawh a; dilna 76, a vaiin cheng nuai 8.63 senna tur buaipui mek a ni tih a sawi bawk.
Ruihhlo do beihpui thlak mekah ruihhlo ngaite tan kohhran, NGO leh sawrkar thawhhonain Hulhliap Short Stay Centre buatsaih a ni a, mi 817 vel enkawl tawh an ni tih Social Welfare minister ni bawk Lalrinpuii hian a sawi a. Ni 5 chhung thlarau lam intuaitharna, damdawi hmanga inenkawlna (medical treatment /detoxification) ni 10 leh rilru lam inenkawlna (psychological treatment) ni 5, a vaiin ni 20 chhung Synod Revival Camping Centre Neihbawiah hun hmanpui an ni a. Heta tanga an chhuah veleh after care follow up atan thla thum chhung vil zui thin an ni a, Bana Kaih Scheme-ah ruihhlo bansan tak tak leh tumna nei chu skill training neihpui an ni tih a sawi.
Skill training hi trade chi thum – food processing, assistant electrician leh aluminium fabrication-ah vawi hnih buatsaih a ni tawh a, mi 67 an inzirchhuak tawh tih sawi a ni.
Ruihhlo ngaite enkawlna, Hulhliap Short Stay Centre kalpuina atan hian sawrkarin cheng nuai 113 a seng tawh a; tunah hian social infrastructure cess hmuh tur atangin cheng nuai 150 chu Hulhliap Short Stay atan ruahman belh nghal a ni tihu a sawi.
Hulhliap SCC hi vawiin – November 17 atang hian batch 6-na kalpui tum a ni a, tun tumah hian zu avanga harsatna tawkte thlur bing an ni thung dawn tih sawi a ni.
MUHCS-ah nuai 6900+ seng tawh
