Mizoram Universal Health Care Scheme atana sawrkarin sum a ruahman chu a hmangtu Mizoram mipui tan a inphuhruk zo turah an ngai tih a buaipuitute chuan an sawi.
Mizoram State Health Care Society hruaituten zawhna an chhan danin, MUHCS hian Mizoram khua leh tui dik tak chauh a huam a; MUHCS 1.0 ah khan mi 2,88,702 an inziaklut a, MUHCS 2.0 ah 3,20,123 an inziaklut tawh thung. Sawrkar hnathawk nghet leh AP-PMJAY hmangtute chu nikum leh kuminah a danglam tam loa, kumina inziaklut an pun chhan hi mipui nawlpui (general beneficiaries) inziaklut an tam tak vang niin, civil pensioner-ah pawh sang khat chuangin an pung.
Hethlai hian MUHCS 2.0 atana sum dah dan chu, state sawrkarin hemi atan liau liaua a dah vaibelchhe 130, mipui nawlpui inziahluhna fee atanga lut vbch. 15.5, sawrkar hnathawk contribution vbch. 22, pensioner contribution vbch.12, health care scheme atan bika sawrkarin sum (corpus fund) a dah hran chu a sum lu hmang loin a interest chauh hman tur niin heta tang hian vbch.16 beisei a ni. Sawrkar laipuiin AB-PMJAY hmangtute tana sum a rawn tum tur atangin vbch. 20.5 leh Asian Development Bank atanga Mizoram sawrkarin health care atana sum a pukah interest vbch.8 beisei nen, a vaiin a tlem berah vbch. 224 awm tura ngaih a ni.
MUHCS 1.0 ah khan damlo inenkawlna senso dil 108518 atangin, Sum hman zawng zawng hi cheng vaibelchhe 171.55 a ni.
Mizoram mipui mi nuai 13 chuangah, inziaklut zawng zawng atangin mi nuai khat velin MUHCS hi hman an mamawh tura chhut chhinin, tuna sum an dah chu inphuhruk zo turah an ngai a. Chutihrualin, damlo enkawlnaah hian vbch. 300 chuang sen ngai ta ang se, sawrkarin huamin additional fund pawh pe ta tehreng mah se, mi cheng zat atanga chhutin kan sum hman hi a inphu tawk em, tih erawh finance lam thlirna atang chuan thil chhut ngai a ni thung tih an sawi.
MUHCS atana sum dahah inphuhruk zo turah inngai
