MUHCS zawm duh damdawi in
13 zingah ziahfel pui la awm lo
Mizoram State Health Care Scheme thar zawm duh damdawi in 13 zingah ziahfel pui an la awm loa, indawrna a la kal zel.
Mizoram sawrkarin health care scheme thar a duan, cashless-a kalpui – Mizoram State Health Care Scheme (MUHCS) hi 2025 April 1-a kalpui tan a nih atangin sawrkar damdawi in ni lo, mimal leh kohhran damdawi in zingah a tirah zawm nghal duh lo engemawzat an awm chungin, a zawm duh an pung zel a; zawmtu zingah hian kohhran enkawl damdawi in an tel vek tawh a, mimal enkawl damdawi in thenkhat an tel tawh bawk. Mimal damdawi in zingah Aizawla damdawi in lian leh lun ho an la tel loa, sawrkar chuan a mal te te in MUHCS zawm tura ngenna lehkha a thawn vek a, an ni pawh hian kum 2025 kumtawp lam khan an zawm duh thu hi sawrkar hnenah an thlen tawh a ni.
MUHCS zawm duha sawrkar nena indawr mek hi private hospital 13 an ni a. Aizawla damdawi in 11 – Trinity Hospital, Ebenezer Medical Center, LRM Hospital, Aizawl Hospital & Research Centre, Alpha Hospital, Agape Hospital, Greenwood Hospital, City Hospital, Adventist Hospital, Rosewood Hospital, Care Hospital bakah Serchhip-a Mercy Hospital leh Lunglei-a Hope Hospital an ni.
The Aizawl Post thudawn danin, heng damdawi in ho hi sawrkarin lehkhaa a ngenna an chhan let hnu ah a mal te te in Mizoram State Health Care Society hotute nen an inkawm leh vek tawh a. A then chuan sawrkar ruahman dan hi an pawm theih mai laiin, la inrawn ve leh duh an awm bawk a; sawrkar pawhin heng hospital-in damlo enkawlna senso (rate) an siam dan an zirchiang a, damdawi in that leh lun dan azirin point pek an ni a, hemi zulzui hian an rate pawh enpui a ni. Hemi ang hian thutlukna siam tur a ni a, an la indawr mek zel.
Hetihlai hian kumin January 16 khan Global Health Pvt Ltd. New Delhi leh Mizoram State Health Care Society hian thawhdunna tur thuthlung an ziak a. Global Health Pvt Ltd. hnuaia damdawi in 6 – Medanta Hospital, Gurugam; Medanta Hospital, Lucknow; Medanta Hospital, Noida; Medanta Hospital, Ranchi; Medanta Hospital, Indore bakah Jay Prabha Medanta Super-Speciality Hospital, Patna chu MUHCS atan hian empanelled an ni:
MUHCS zawmtu damdawi in hi Mizoram-ah 15 an awm tawh a, private day care centre 3-in an zawm tawh bawk. Mizoram pawnah Global Health Pvt Ltd. thawhpui hma hian empanelled hospital 27 an awm tawh a, deemed empanelled hospital 12 an awm tawh bawk.
Hetihlai hian Mizoram State Health Care Society chuan kumin January 16 bikah khan MUHCS bill cheng vaibelchhe 2.77 a pe chhuak a. 2025 April 1 atanga MUHCS bill pek chhuah tawh zawng zawng hi cheng vbch. 115.29 niin, dam lo 68022 enkawlna a ni.
MUHCS zawm duh damdawi in 13 zingah ziahfel pui la awm lo
