Assam Chief Minister thusawi hnawlin Meghalaya Chief Minister Conrad Sangma chuan March 21 khan Assembly-ah Mukoroh village, inter-state border inchuh mek nikum ami paruk laiin nunna an chan phahna chu Meghalaya ram chhunga awm a ni, a ti.
Mukroh-a chengte chu a sorkar in scheme hrang hrang a pekchhuah dawngtute an ni tiin a sawi bawk a.
A hma lawkin Assam CM Himanta Biswa Sarma chuan Assam Assembly-ah Mukroh chu Assam ram chhunga awm tiin a sawi ve thung.
“Mukroh hi Meghalaya ram chhung ngeia awm a ni a. Chu chu facts and figures in a pholang chiang hle a. Sawi dan dang a awm thei ang a, kan dinnaah erawh kan chiang a ni,” tiin Sangma chuan a sawi.
“Census code chuan Mukroh chu West Jaintia Hills district chhungah awm a ti a. Tun hnaia Meghalaya Assembly poll-ah pawh Mukroh ah vote thlak a ni. He khuaah hian voter 1,500 vel an awm a, polling station pahnih lai Mokaiaw constituency chhungah a awm a ni,” tiin Conrad Sangma chuan a sawi.
Mukroh-ah village employment council awmin MGNREGA hnuaiah beneficiary 500 chuang an awm a ti bawk a. Mukroh khuaah hian fair price shop pahnih a awm a, beneficiary 2,200 chuang an awm a, school leh health centre te Meghalaya sorkar din vek a ni, a ti bawk.
Sangma chuan central scheme dang Pradhan Mantri Awas Yojna (Grameen) PMAYG, Jal Jeevan leh Swacch Bharat Mission (SVM) te pawh he khuaah hian kalpui a ni, a ti bawk.
Nikum November thla khan Mukroh khuaah hian Assam state forest personnel tena thingzai ruk nia hriat phurtu truck dan an tumna lamah buaina chhuakin Mukroh khua mi paruk leh Assam forest guard ten nunna an chan phah a.
Kha vanduaina kha inbiak pawhna official tena an neih that tawk lohin a hrin nia ngaih niin a hnuah pawh boruak tang tak a siam zui reng phah a ni.
“Kan thenawm te nen inbiakpawhna tha thil duhawm lo a thlen zui loh nana kalpui chu tihmakmawhah kan ngai a, he mi atan hian SOPs te pawh pawm fel tawh a ni,” tiin a sawi a. Sangma chuan November 22 a tharumthawhna chhui chianna kalpui mek a ni, a ti zui bawk.
Mukroh khua Meghalaya ram a ni ti
![](https://theaizawlpost.org/wp-content/uploads/2023/03/meg-1.jpg)