Murray nena inkawp zui tur Djokovic a tlawm

Murray nena inkawp zui tur Djokovic a tlawm
Grand Slam final-a tum sarih ngawt a hmachhawn tawh Andy Murray kha coach atan a ruai chhunzawm dawn tih a puan hnu lawkah Thawhlehni khan Novak Djokovic chu Qatar ram tournament-ah Matteo Berrettini hneh loin a tlawm a, Qatar Open first round a paltlang zo lo.
GRand Slam title pathum la ve hman Murray leh Djokovic hi kumin January thla Australian Open-ah khan an thawkdun tan a, an inrawih dan erawh a nghet ni loin enchhinna (trial basis) chauh a la ni a, mahse, Djokovic kha semi-final match-ah kaihza tha na avangin a inhnukdawk ta a ni.
Melbourne-a a tlak hnu khan 24-time Grand Slam champion chuan an hmalam huna an inrawih chhunzawm leh chhunzawm loh chungchangah amah leh Murray chuan ngunthluk taka an sawidun a ngaih thu a puang a, mahse, Qatar Open-a Berrettini a hmachhawn hma lawk khan Djokovic chuan a coaching team-a Scot kirleh tur thu a nemnghet ta a ni.
Kum 37 mi ni ve tawh Serb chuan ATP Tour in-house media channel, external an tih kaltlangin Briton nena an thawhdun chhunzawm tur thu a puang.
World number seven Djokovic tan tun kha Australian Open semi-final match pakhat zawka Alexander Zverev a hmachhawn hnua singles match a khelh leh vawikhatna niin, nikum August thla aia tennis khelh bansan ta Murray nen hian rin loh takin nikum November thla tawp lam khan an thawkdun tan a, a hmachhawp hraw ber mai hlenchhuak turin an thawk zui zel rih phawt dawn niin a lang.
Tarlan tawh thin angin, Serbia superstar Djokovic hi Australia nu ropui Margaret Court-i nen Grand Slam title 24 la tling awmchhun niin, chu record intawm mek kalsana tennis player piang chhuak tawh zawng zawng zinga major title 25 la tling awmchhun nih a tumna kawngah May ni 24 atanga khelh tan tur major tournament dang French Open hi an hmachhawp a ni.
Qatar Open first round-a Djokovic-a hneh loh kum 28-a upa Berrettini tan tun kha Serb a hmachhawn vawingna niin, kum 2021 Wimbledon final-a a hneh loh Djokovic laka a chak vawikhatna a ni.
Hliam avanga hun rei tak a chawlh hnuah nikum khan title pali la thei khawpin khelmualah Italian payer Berrettini a kir a, ATP Comeback Player of the Year 2024 atan thlan a ni nghe nghe.
Chuti ang player tawnhriat ngah ve tawh tak chuan Arab rama ATP 500 event khelh mek second round-a Tallon Griekspoor hmachhawn turin tunhma lama vawili a hneh loh tawh Djokovic a hneh a, inrintawkna a ngah sawt a rinawm.