Myanmar lama ralthuam tawlhruknaa inhnamhnawih nia sawite lakah India sawrkar hnuaia awm National Investigation Agency (NIA) chuan a thil chhui hna a zo tawh a, kar kalta khan court-ah an thil chhuina kimchang – chargesheet an thehlut.
NIA thuchhuah danin, ralthuam leh puak thei thil dang man chungchanga thubuai an siamsak mi 10 hi Mizo vek an ni a. Indian Penal Code, Arms Act leh Explosive Substance Act section hrang hrang tlawhchhanin thubuai an siamsak a, an thil chhui finfiahna an neih ang ang chu NIA Special Court-ah court-ah an thehlut tawh a ni.
He thubuai lo irhchhuahna hi, 2022 May kha a ni a, Aizawl district Kelsih khaw daiah lirthei pahnih atangin silai leh a mu thahnem tham tak bakah ralthuama hman theih dang man a ni a, thubuai ziahluh a ni. An thil manna lirtheia chuang mi pali chu man an ni a. NIA hian la zuiin, Myanmar mi, an ram chhung leh Mizorama an thawhpuite nen Myanmar sawrkar sipai dotu pawlte tanpuina atan ralthuam an leikhawm thin nia sawi a ni.
An man zinga pahnih hi dan anga puak thei thil kawl leh zawrh phalna nei niin, an thurualpuite nen hian Myanmar lamah ralthuama hman theih puakthei thil tawlh luh tum nia sawi an ni. Aizawla dan hnuaia silai zuartu zingah pawh he thila inhnamhnawih nia puh an nei bawk.
Myanmar-a ralthuam tawlhrutu nia puhte NIA-in chhui zo tawh
