Myanmar-ah buaina nasa

Chinese border Myanmar hmar chhak lama displaced person camp artillery hmanga beih avangin mi 29 in nunna an chan a, nunna chan zingah hian naupangte pawh an tel a ni.
He camp hi Kachin Independence Organisation (KIO) te thuneihna hnuaia awm niin kum tam tak chhung mahni inrelbawl hrang nih duha hel tawh te an ni. Nunna chan te hi civilian te vek an ni, tiin KIO thupuangtu chuan a sawi a.
Kachin State-a buaina kum 63 lai awh tawha inbeihna nunrawng ber pawl tia sawi a ni a. Kachin officials te chuan armed forces te chuan tun hnaiah KIO te enkawl hmun te chu an bei nasa hle tia sawiin Kachin te hian military government beitute an thlawp vang tiin a sawi bawk a.
Myanmar ram tam zawk chu kum 2021-a military coup thlen hnuah civil war chhuakin a chiah mek a ni reng a. Military te chuan opposition te thunun khua te beih nan air strike te a hmang awl lo a ni.
Exiled National Unity Government (NUG) te chuan Myanmar sipai-te chu he camp hi runah an puh a. An chetlak dan chu ‘crime against humanity’ tiin an sawi bawk a.
Junta thupuangtu Major General Zaw Min Tun thung chuan sipaite chuan inhnamhnawihna an nei lo tiin a sawi ve thung a. Army te chuan helai hnaiah operation an neih loh thu sawiin explosive an dahthat puakin a thlen a ni zawk ang a ti bawk.
He thil thlenna hmun hi Chinese border hnaih te KIO tena headquarter an neihna Laiza khaw bul lawka Mong Lai Khet camp ah a ni a. Camp hi nasa taka tihchhiat a ni.
Kachin officials te chuan nunna chan zinga 11-te chu naupang an nih thu sawiin hliam tuar 56 an awm a, an zinga 44 te chu damdawi in panpui ngai tiin an sawi.
United Nations chuan thil thleng chu an ngaihven takzet thu an sawi nghal a. “IDP camp te hi inhumhimna hmun niin civilian te awmkhawmna a ni a, beih tur a ni lo,” tiin an sawi nghal thung.
Helai camp awmna hmun hi kum tam tak inbeihna ber pakhat niin a chhan ber pawh frontline atanga a hlat loh vang niin Kachin sipaite leh sorkar sipaite inbeihna thlen fo na a ni a. Mahse, tun hnai teah chuan inbeihna a thleng ngai lo tiin tualchhung mite chuan an sawi.
Kum khat kalta khan Mayanmar air force te chuan Kachin camp a open-air concert zan lama neih chu precision guided bomb hmanga bei tawhin nunna chan 80 chuang an awm tawh bawk.
Kachin Independence Army (KIA) hi KIO armed wing te niin Myanmar-a insurgent group lian ber te leh thiltithei ber te zinga mi a ni a. Kum 1960 vel atang khan Myanmar central government nena inbei tawh niin kum 2011 a inkahhaina an siam chu bawhchhiatin a awm reng bawk.
Sipai tena sorkarna an chelh hnuah sipaite chuan KIA chu hlauhawm zualah ngaiin anmahni mai ni lo insurgent group dang te pawh ralthuam leh training pe thinah puhin ram chhung hmun hrang hranga sipaite dodaltu tiin an sawi.
KIA te hi Arakan Army te, Kachin State a indin te nena thawkho reng an ni bawk a. Mahse, Arakan Army te hi chuan kum 2016 atang khan Rakhine State bik an thlurbing ta thung a ni.