Champhai district dep Myanmar lamah Chinland Defence Force (CDF) Hualngoram leh Chin National Defence Force (CNDF) chu nasa takin an inkap a, Champhai district-a Zokhawthar-ah ramri depa awm Myanmar mi a sang tel an raltlan.
Zokhawthar bul, Myanmar khaw hmasa ber Khawmawi dai hmun hnihah pawl pahnih hi an inkap a, Zokhawthar mipui sawi danin, Zirtawpni zanah silai a ri a ri tawh a, Ningani zanah pawh silai puak ri hriat tur a awm tawh. Inrinni tuk dar 8.45 vel atangin nasa takin an inkap ta a, tlai dar 5.00 velah a reh. Mahse zan lamah pawh silai puak ri hriat tur a awm leh a ni.
Zokhawthar leh Khawmawi hi |iau luiin a daidang a, Khawmawi khaw mipui hi an tlanchhe deuh veka ngaih a ni.
Zokhawthar atanga luhin Khawmawi vei lama kalin Haimual kawng a ni a, ding lam chu Rihkhawdar leh Rihdil kawng a ni. Haimual lam leh Rihkhawdar lama Khawmawi dai ve veah nasa takin pawl pahnih hi an inkap tih thu dawn a ni.
Thi leh hliam zat hriat a ni rih lo a, an inkah chhan pawh hi sawi dan hrang hrang a awm. Inkahnaa nunna chan pakhat - C Lalhmuakmawia (37) s/o Khawmawii a thi a, a ni hi CDF Hualngoram lam mi nia sawi niin, a ruang hi a nu chenna Aizawl Chanmari West-ah lak tum a ni.
Raltlan pakhat chu leiah kal lovin |iau kan a tumna lamah luiah hian Inrinni chawhnu dar 3.00 vel khan a tla a, Zokhawthar khawtlangin Inrinni chhunah khan a ruang an zawng nia sawi a ni a. Thu hriatchian hnu ah amah hi Zokhawthar mi, Khawmawi lama inhlawha kal, inkahna a thlen avanga ramri kan tuma luia rawn hleuh phei, chesual zui ta a ni tih thu dawn niin, dar 6.00 pelh hretah Zokhawthar khaw hlui North Hruaikawnah a ruang hi an lo hmu tih sawi a ni.
Zokhawthar bul maia inkap an nih avangin Zokhawthar mipuiin silai puak ri an hriat phak reng bakah silai mu siper pawh Zokhawthar-a lut a awm nual a, in chung tihchhiat leh tuizem tihchhiat pawh a nei a ni.
Zokhawthar lam hian khawtlang information centre hmangin pawl pahnih hi inkap tawh lo turin an ngen a, Zokhawthar lam hawia silai hmet puak lo turin an ngen bawk. Inrinni khan Zokhawthar mipui chu pawna chhuak lova ina tawm turin an inchah a, chhuah ngamna chi pawh a ni lo tih thu dawn a ni.
Chawlhni-ah Khawmawi chhak Rihkhawdar bul velah inkap an awm leh a, Zokhawthar atanga an thawm hriat phak khawp chu a ni lo. Rihkhawdar khaw mite an tlanchhia a, Zokhawthar an pan ve leh tih thu dawn a ni a. Ramri bul dang Vaphai leh Saikhumphai lamah pawh an inkap tih sawi a ni bawk.
Khawmawi hi CNDF hian an awp zui rih a, Khawmawi khaw mite hi an haw ngam mai dawn em hriat a ni loa, boruak hi a la chiang thei rih lo tih thudawnna chuan a sawi a ni.
Hetihlai hian Mizoram sawrkar chuan Myanmar-a pawl pahnih inkara buaina chungchangah hian aiawh a tir nia thu dawn a ni a, Pathianni khan Zokhawthar an thleng a, helai chhehvelah hian remna a awm theihnan inbiak tum a ni.
