Tun hnaiah Mizoramah Manipur atangin mi sing chuang an tlanchhia a, Myanmar atanga raltlante thawm pawh a luahlan deuh. Myanmar atanga Mizorama raltlante thawm hi thil dangin a hliahkhuh deuh bakah an pung lo hrim hrim bawk. Mizoram sorkar chhinchhiahna thar ber, July ni 22-a mi-ah chuan Myanmar atanga raltlan hi Mizoramah mi 31428 an awm. April ni 2-ah khan mi 31807 an awm tia chhinchhiah a ni a, tun hnaiah a hma aiin an tlem tihna a ni.
Myanmar atanga raltlan hi mipa 9665 leh hmeichhia 9544, naupang 12219 an ni.
Police lam chuan Myanmar atanga raltlan zat hi a pung thur thur lo a, lut thar an awm pawhin tlem te te an ni tih an sawi. Raltlan engemaw zat chu mahni khaw lamah an kir leh a, chutih rual chuan kir leh engemaw zat chu Mizoramah an let leh bawk a, kartawn an awm thin avangin, a zat chiah hi chiang faka chhinchhiah a har an ti.
Myanmar atanga raltlante hi Mizoram sorkarin felfai zawka chhinchhiah a tum mek a, sorkar laipui thu angin biometric details tih tum mek a ni.
April ni 28-ah khan Mizoram, Manipur, Assam Rifles hotute chu ministry of home affairs hotute nen an inkawm a, Myanmar atanga raltlante biometric details la turin ministry of home affairs hian a ti a ni. Hei hi Mizoram sorkarin a bawhzui mek a, district hrang hranga he hna thawk turte zirtir mek an ni.
Mizoram sorkar hian a hmain raltlante hi a lo chhinchhiah tawh a, an kutzungpui pakhata an kutzia lak niin, ID card pek zel an ni. Ministry of home affairs hian an kutzungpui pahnih leh an kutzungtang dang pali-a an kutzia lak tur a ti a ni.
Myanmar atanga raltlan zat pung lo
