Hun engemaw chen raltlan lut thar, a hlawma lut an awm tawh loh hnuah tun hnaiah Myanmar atangin Mizoramah a hlawmin raltlan an lut leh a, an tam lam erawh chiang taka hriat a ni rih lo.
Tun hnaiah Lawngtlai district-ah Myanmar atang hian raltlan vawi hnih an lut a, Lunglei district-ah vawi khat an lut bawk.
Lawngtlai district thuneitute hnen atanga thu dawn danin, April ni 25 khan an district-a Hruitezawl khuaah lut an awm a, April thla tirah khan Diltlangah lut an awm bawk.
Hruitezawl-a lut an awm thu hi tun karah khawtlang hruaitute atangin an hre chauh a, an tam lam leh an dinhmun te hriat chian an tum mek.
Mi 80 vel nia hriat an ni a, hmeichhia leh naupang pawh an awm nia hriat a ni. Hruitezawl khua-ah hian camp emaw a awm loh avangin a remchan dan ang anga khawsaktir an ni a, mi in hnuai luahtir te pawh an awm.
Diltlang-ah pawh April thla tir lamah khan a huhova lut an awm a, mi 25 vel nia hriat an ni.
Thla hmasa bawk khan Lunglei district-ah Myanmar atangin raltlan a huhova lut an awm a, thu dawn danin, mi 150 vel an ni. Anni hi Khumi hnam an ni tih thu dawn a ni.
Myanmar atangin a hlawmin raltlan lut leh
