February 2021 military coup thlen hnu atanga thla 20 chhungin Myanmar-ah civilian 6,000 chuangin nunna an chan tawh tiin Peace Research Institute, Oslo nena report an tihchhuah chuana tarlang.
“Kan data ang chuan buaina avanga mihring nunna chan phahna chu a hmaa report aiin a sang zawk a, henga mawhphurtu ber chu junta te niin anti-junta te pawhin an kut atangin thisen an chhuah nasa tho” tiin Stein Tonnesson, he report co-author chuan a sawi.
Politics thil avangin civilian 6,337 in February 1, 2021 atanga September 30, 2022 chhungin nunna an chan phah a, hliam tuar 2,614 an awm an ti bawk.
Nunna chan leh hliam zat hi a hmaa report te aiin a sang fe a, international organisation hrang hrang tena a hmaa report an siam aiin a sang vek a ni.
Report chuan civilian nunna chan zahve dawn 3,003 te chu Army, police leh militias te kuta thi an ni a, midang 2,152 te chu opposition group te kuta thi an ni an ti bawk.
Midang sawm pahnihte chu regime emaw opponent te kut ni lo va thi an ti a, midang 1,170 te chu an thih chhan hriat chian theih loh an ti bawk.
“Media-a tarlan ai daihin nunna chan an sang a, heng kan report te hi rintlak tak tak vek atanga kan lakkhawm a ni tiin report chuan a tarlang bawk a. “Tichung hian nunna chan tam tak te chu report loh a nih avangin a zat chiah hriatfiah ngaihna a awm lo,” an ti bawk.
Inthlanah thil dik lo nasa taka tihin a awm tih chhuanlamin Myanmar sipaite chu Aung San Suu Kyi sorkar chu paihthlain thuneihna an chang zui a. Chumi hnuah opposition te chu nasa taka bei nghalin mi 23,000 chuang an man zui nghal tiin local watchdog te chuan an sawi. Myanmar hi buainain a la chiah reng a, sipai thuneihna duh bau lo pawl an la awm reng.
Myanmar buainaa nunna chan tam
