Myanmar sipai inpe leh, thawn kir leh dawn

Myanmar sipai 40 chuan Mizorama an inpek
hnuah mi dang 30 dawn an inpe leh a, inpe tharte pawh hi a hmaa mite ang bawkin Myanmar lamah thawn kir an ni leh dawn.
November ni 16, Ningani khan Myanmar sipai 29-te chu Champhai district-a Saikhumphai-ah lutin an inpe a, Mizoram Police te’n lo dawngsawngin, Assam Rifles kutah an hlan a ni.
Chawhnu lam dar 2.18 velah Saikhumphai hi an thleng a, Mizoram Police lam hi Champhai SDPO-in a ho a, Vaphai VC te leh YMA hruaitute an tel bawk. Farkawn atanga kal Assam Rifles kutah an hlan nghal a ni.
Inpe tharte hi Myanmar-a Tuibual khuaa duty an ni a, major hovin kein Saikhumphai hi an pan a ni. Tuibual atang hian km 10 vel kein an kal nia ngaih a ni a, hliam tuar an awm lo tih thu dawn a ni.
Tuibual-ah hian Thawhlehni zan dar 11 vel atang khan a tuk zing lam dar 4 vel thlengin Myanmar sorkar sipaite leh CNDF (Chin National Defence Force) te an inkap a, sorkar sipai lam hi a tawlh zawkah an tang a ni. Thi leh hliam an awm leh awm loh hriat a ni lo a, sipai 29-te chu Mizoramah an tlan lut a ni.
A hmain Myanmar sipai hi mi 43 chu Mizoramah an lo tlan lut tawh a, anni hi chu Zokhawtharah vek an lut. Hliam tuar pakhat a awm a, ani hi damdawi inah zan khat enkawl niin, an vaiin Hnahlan helipad atangin Myanmar-a thawn kir an ni tawh.
Tun Mizorama lut mi 29-te pawh hi India sorkar thu angin Myanmar-a thawn kir leh tur an ni a, Hnahlan atang bawkin nge hmun dang atangin an thawn kir dawn tih hriat a ni rih lo.