Myanmar sipai sorkar chuan ethnic armed group intelkhawm tena China nena inrina hmarchhak lama ramri hnaiha khawpui pawimawh tak chu an lak hnuah a sipaite a hnuhkir thu a sawi chiang.
Three Brotherhood Alliance te chuan January 4 khan Laukkaing khawpui an thunun a, Myanmar sipai te chuan an ralthuam te kalsana khawpui an chhuahsan erawh remtihsak an ni a. Alliance te hian ralthuam thahnem tak an neih belh a ni.
Laukkaing hi Kojang Self-Administration Zone capital niin Myanmar hmarlam Shan state a awm a ni a.
Three Brotherhood Alliance-ah hian Myanmar National Democratic Alliance Army, Ta’ang National Liberation Army leh Arakan Army te an tel a. MNDAA bik hi ethnic Chinese Kokang minority te military force a ni.
Laukkaing laka awp hi October 27 a beihpui an thlak atanga an thil tum ber ni sa a ni bawk.
Myanmar sorkar thupuangtu Majpr General Zaw Min Tun chuan pro-army website Popular News Journal hnenah thil thui tak thlirin sipai chhungte leh sipaite himna turte ngaihtuahin local commander te chuan Laukkaing chu rauhsan an remti a ni tiin a sawi a.
Thutlukna siam a nihnaah Myanmar chuan China nena inlaichinna pawh a ngaihtuah tel a ti bawk a, Laukkaing hi China nena inrina bul maia awm a ni.
China chuan Myanmar sipai leh ethnic alliance te nen inzawmna tha tak a nei ve ve a, indona a tawp theih nan hma pawh a la bawk. Nilaini kalta khan artillery shell kahchhuah chu China ram chhunga a tlak avangin China chuan a sawisel a. Major General Zaw Min Tun chuan artilerry shell chu Alliance te kahchhuah niin mahse sipaite tih anga an puhna chhan chu China nena inlaichinna chhia se an duh vang a ti.
Three Borther Alliance te chuan kar kalta Zirtawpni khan thuchhuah siamin Kokang region pum chu ‘Military Council-free area’ an ti bawk.
Myanmar sipai 2,389 lai brigadier paruk leh an chhungkuate nen vek inpein hmun him zawka thiar nghal an ni tiin an tarlang bawk a.
A hnu lawkah social media-ah video clips tihchhuah niin sipai leh an chhungte chu vehicle hrang hranga an phur lai tihchhuah a ni a. A tam ber te chu Lashio, Shan northern region capital-ah phurh an ni a, inremna an siam angin heng sipaite hi thawn haw an ni dawn a ni.
Laukkaing khawpui laksak hi Alliance tena Myanmar sipai laka hnehna an chan lian ber a ni bawk a. Myanmar sorkar chuan a ram chhung hmun hrang hrangah helna nasa tak a hmachhawn mek avangin a tal buai hle tawha ngaih a ni bawk.
Ethnic armed organisation te hian kum sawm tam autonomy lian zawk an lo ngiat tawh a ni. February 2021 a Army tena civilian sorkar Aung San Suu Kyi kaihhruai an paihthlak atang khan Maynamr-ah civil war chhuakin a nasa tial tial bawk.
Three Brother Alliance te hian Shan state pawn lamah Myanmar sipaite beih zel an tum dawn em a la chiang lo va, mahse, sipai rorelna paihthlak a nih theih nan chuan beih zel an lo intiam tawh thung.
Alliance tena an tum ber chu military rule pahthlak a, helai bial vela organised criminal enterprise turu tak nuaichimih niin a bik takin Chinese investor tena local Myanmar warlords te thawhpuia cyberscam operation turu tak an kalpui tihtawp te a ni a. Chung tihna hmunpui chu Luakkaing niin heng thila inhnamhnawih mi tam tak tun hnaiah Alliance te chuan China hnenah an hlan tawh a ni.
MNDAA te chetlakna hi Kokang Self-Administered Zone thunun an tumna ni bawkin Myanmar sipaite thlawp Kokng group te chu an nawr chhuak bawk a ni.
Peng Deren, MNDAA commander chuan sipai hmun 250 thunun tawhin China nena inpawhna ramri kanna panga an thuhnuaiah a awm tawh tiin Kumthar thuchah a sawiah a lo sawi tawh bawk a. Cyberscam centre 300 chuang dap tawhin henga inhnamhnawih Chinese khua leh tui 40,000 chuang thawn haw an ni tawh a ti bawk.
February 2021-a Aung San Suu Kyi civilian sorkar paihthlak a nih khan thupek kenkawh nana an hman chu tharum a ni a. Pro-democracy politician tam tak lung inah an khung a, an khung zingah Suu Kyi ngei pawh telin chu mai bakah lungawilohna lantirtute lakah tharum nasa takin an hmang bawk.
Sipai sorkar pian hnuah civilian leh pro-democracy activists 4,000 chuangin nunna an chan phah tawh a, lung ina khung mek 20,000 chuang an awm tiin advocacy group te chuan an sawi a. UN chuan raltlan maktaduai 1.7 vel an awm ti bawkin sipai sorkar duhlohna lian tak vangin Myanmar ram pum chu a buai mek a ni.
Tun hma zawng kha chuan Suu Kyi kaihhruainain pro-democracy movement pawh tharum thawhna tel lova neih thin a ni a. Tunah erawh pro-democracy movement chuan Suu Kyian model chu hnawlin hel pawl an indin ve ta thung a, hel lo awmsa tawhte nen ethnic rebel te nen tang hovin hma an la zui ta a, chu chu sipai sorkarin a beisei hauh loh a ni bawk.
Myanmar sipai ten Lukkaing tlawm thu sawi
