Myanmar-a sipaiten kartawpa hmun hrang hrang an beihnaah nau piang hlim telin mi 15 vel an thi a. An kah zingah nau neihna hmun leh sikul pawh a tel niin chibil ralthuam keng pawl, tanpuitu leh mihring dikna chanvo humhalhtuten an sawi.
Hun eng emaw chen ram dang nena an inpawh loh hnua an ram sorkarin thian tha siam a tum leh mek laiin anmahni duh lotu pawlte laka an ram hloh tawhte lak kir tumin an bei thar mek a, hmun tam zawk an thunun leh tawh.
Sipaiten an thlawp sorkar thupuangtu chuan kartawpa an chetna nia sawi hi engmah a sawi rih lo va; mahse, tun hmaa hetianga an chetnaah hian ‘mi firfiakte’ lakah beihpui an thlak niin a sawi thin.
Pathianni khan khawthlanga Rakhine state-a khaw pali chu thlawhna hmangin an kap a. Tun hnaiah state hmun zau tak awptu, state khawpui, Sittwe pawh hnaih tawh tak, Arakan Army nen an inbei nasa hle a ni.
Kyauktaw-a lei an kap fuh a, Kyaukpyu leh Pauktaw an kap a, Arakan Army-ten an awp, Mrauk-U khuaa damdawi in leh nau neihna atana siam chawp hmunte an kap bawk a. Mi 12 vel an thi a, mi 32-in hliam an tuar bawk niin Arakan Army thupuangtu leh tanpui hna thawktuin a sawi.
Chawlhkar khat mi lek nausen hmeichhia chu an chenna in chimin a delh hlum a, a phirpui erawh a dam chhuak niin Mrauk-U-a tanpui hna thawktu, Wai Hun Aung-a chuan a sawi.
Damdawi ina thawkte nen mi pali an thi bawk niin a sawi.
Hemi hma ni hian Thai ramri hrul, Kayah state-a Loikaw chu sikul kai laiin thlawhna atangin kah a ni bawk a, zirlai pathum thiin pangain hliam an tuar niin Karenni Human Rights Group (KnHRG) chuan Thawhtanni khan an sawi.
Thai sorkar chuan ramri hnaiha buaina a nasat thar avangin indo thlawhnate an patrol-tir a, an ram chinah pawh in chhia leh hliam tuar pakhat a awm niin an sawi.
Thai Prime Minister Anutin Charnvirakul-a chuan Myanmar hnenah hian an ram buainain Thailand a nghawng loh nana hma la turin a hrilh tih a sawi.
Y-12 transport aircraft leh indo thlawhnain Loikaw sikulah bomb 20 an thlak niin KnHRG leh Karenni Interim Executive Council Secretary Banyar Khun Aung-a chuan a sawi a. An khuaah hian indona emaw, sipai emaw awm an awm lo tih a sawi bawk.
Myanmar hi sipaiten kum 2021-a Aung San Suu Kyi-i kaihhruai mipuii thlan an paih thlak hnuah tual chhung indona a chhuak zui a, UN chuan mi 1,00,000 vel thi leh in leh lo tlanchhiatsan mi maktaduai 3.5 chuang an awm tawh niin a sawi.
Sipai helna hruaitu, tuna president ni ta, Min Aung Hlaing-a sipaite hian China, India leh Russia atangin thlawpna an hmu a. Tun hnaiah a sorkar hian ram dang pawh a hnaih leh tan a, Donald Trump-a sorkar pawhin kum tam tak a kawmserh hnuah tun hnaiah US thuneitute nen pawh an inbia nia hriat a ni.
Hetih lai hian a sipaite hi an ram chhunga anmahni duh lotute lakah hma an sawn thei lo hle a, boruak atanga mi beih chu an hmanraw hman lar a ni a. An hmanrua hi lehkha ruk hmanga Iran atanga an lak luh nia hriat a ni tih Reuters chuan a lo tar lang tawh.
UN chhuitute chuan August thlaah khan Myanmar-a sipaite hian van sang atangin civil mite thil, sikul leh damdawi in thlengin an bei niin an lo sawi tawh.
Foreign ministry chuan UN puhna hi chhangin sipaite hian ‘civil miten an tawrh loh hram dan dap chungin beihpui an thlak thin’ tih a sawi ve thung.
Thla hmasa lawkah khan Rakhine-a Kyauktaw leh Ponnagyun khua bei tawhin mi 58 vel an thi a, khawvelin a dem hle a ni
Myanmar sipaite chetnaah nau piang hlim telin mi 15 thi
