September ni 28 zanah khan Torchlight Parade Ground, Bannimantap, Mysuru-ah drone show an buatsaih a, drone 2,983 hmangin national animal, sakei lem an siam a, sakei lem siam nana drone hmang tam record an siam.
He event hi Chamundeshwari Electricity Supply Corporation (CESC)-in Dasara festival puala an huaihawt a ni a, 2024 pawh khan drone show an lo buatsaih tawh a, chumi tum chuan drone 1500 an hmang a, kuminah chuan drone 3,000 an hmang ta a ni. CESC Managing Director, Munigopal Raju chuan, “Kan buaipui velna lamah kan national animal(sakei) lem siam nana drone 3,000 kan hman chuan Guinness World Record a siam theih tih kan hrechhuak ta a ni,” a ti.
Record siam ngei tumin hma an la ta a,London atangin Guinness lam aiawh endiktute pawh an chah lut a, an thil tih vel chu aeronautical engineer te, auditor leh legal advocate ten an enpuina leh hriatpuina hnuaiah engkim an tih vek thu a sawi bawk.
A hmaa drone hmanga sakei lem siam record chu drone 1985 hmanga an siam niin, tun tuma hian drone 1,000 velin record hi an rawn khum ta a ni.
He drone show-ah hian sakei lem bakah solar system, world map, India sipai, arawn, dolphin, mupui, rulpui chunga Krishna lam lai lem, Karnataka map leh an CM Siddaramaiah leh Deputy CM D.K. Shivakumar lem, saipui lem leh pathiannu Chamundeshwari lem te pawh an siam a ni.
Mysuru-ah drone hmanga sakei lem siamin record siam
