Lallunghnema
Charity Lodge
Cont: 9862288182
Mizoramah hian Consumer-te hi kan thang harh mek zel a. Consumer Right ngaihventu pawh kan pung sâwt hle niin ka hria. Mi tam takin a kan vei rawn tâk Maximum Retail Price (MRP) ngaih pawimawhna pawh a nasa tan ta viau bawk a. I han sawi dawn teh ang. Sumdawngho kan puhna thin heng Unfair Trade Practice te, Deficient Service te, Expiry Date te, Spurious Goods te, Defective Goods te dodal duhna te hi Mizo mipui thinlungah a riak ve tan ni te pawhin a lang e. Heng Service Provider leh Warranty Period tih tâwngkam te pawh hi mipui rilruah a mikhual ta lo viau mai. Legal Metrology Department-te pawhin ngaih pawimawh a hlawh ta viau mai bawk. Legal Metrology Enforcement-ho hi bûk tling lova thil hralhtute, MRP aia sanga thil hralhtute laka action la theitu an ni a. An pawimawh êm êm a ni. Mahse, thawktu an indaih lo hle. Hei hi Sawrkar tan pawh ngaihthah chi a ni lo.
He Legal Metrology hi thuam chak se,tih hi ka duh hle a. A taka sual do pawl an nih avang pheng hian duhsak pawh an phu ngiang reng a ni.
Centre For Consumer Education-in Consumer Outreach Programme kan hmannaah te hian thil zuartu tam tak chuan MRP an lo ‘aware’ ta viau mai a. A pawng apuia “bungrua lei tawh thleng theih a ni lo” tih pawh hi tam tak chuan an hnu chhawn ta nia hriatna ka neih phah hial a ni. Consumer Outreach Programme hi a tangkai hle a. Neih leh zel tum a ni bawk.
Tichuan, he laia ka sawi tum tak chu mipui hian Consumer Right kan hre chho mek zel. Dawrkai leh sumdawngho pawh an vengva sawt viau tih hi a ni. Mahse, hetih mek laia mak ka tih fo, mak tih ka bansan theih mawlh loh chu hei hi a ni, “mithiamin Consumer Right an hnâwl, an hre tha duh lo,” tih hi a ni. Keini a kul a taiâ Consumer Right buaipuitute tak ngial pawh hi Whatsapp group-a Consumer-te hlâwhtlinna leh Consumer-te tuarna sawi kan la inthlahrung cheu nia mawle! Hetiang hi Sap ramah a awm lo, vai ramah a awm hek lo. Consumer Right ngaihsak lo, Mizo Consumer – te , Mizo Consumer mâwl hi kan va tam em!
Vawiin chu inah ka awm nilêng a, Consumer Right kaih hnawih lam chi hrang hrang ka chhiar a, ka ziak bawk a. Chu tih lai chuan, thil zuartu pakhat hi gate bula dingin a lo au lauh lauh mai a. Kei chuan, Gate lam chu ka va pan a. Tichuan, a thil zawrhte chu lei tum lêm lo chuan ka han en vel a. Mahse, kan chhungkaw mamawh tak mai, Emergency Light hi he (dawr aktu) pa a lo nei a. A man a sang lutuk lo bawk a tiin lei ka duh ta deuhva. He khawnvar hi LED Flood Light Made in China tih a ni a. Dawr aktu pa hian Rs 1,500 /-in a zuar a. Ka han dawr ta tak tak a, Rs 800 /- in ka lei sak ta a ni. A hmâ ni lawk kan meeting-naa ka DA dawn ve atanga ka lei ngat a ni a. Hlu ve tak tur chu a ni. Tlo tak maw le?
Mizoram Electricity Regulatory Commission a piang:
MZERC hi a hming pum chu Mizoram Electricity Regulatory Commission a ni a, Electricity Act 2003 Section 82 tan chhana din leh 2024 July ni 23-a lo piang kha a ni a. A la tuai khawp mai! He nau piang programme hlung tak buatsaihin P&E Minister duhawm tak hova lawm a ni nghe nghe a, kei ve pawh hi ka tel a ni.
Tun hmâ chuan Joint Electricity Regulatory Commission for Manipur and Mizoram tih niin JERC kan ti mai thin. Tunah chuan a hrang ve vein Manipur leh Mizoram te hian Commission kan nei ta a ni a. A lawmawm tak zet a ni.
MZERC Pisa awmna chu:
Mizoram Electricity Regulatory Commission hian Khatla kâwn chhak lawkah Pisa an nei. Postal Address: Peter Sreet TBL Bhawan 2nd – 5th Floor, E – 18, Khatla, Aizawl. Ph. Number: 0389-2333625/0389-2333623 (landline).
Tunah hian Mineco lamah Mizoram sawrkar hian Pisa ngel nghet tak a ngaihtuahsak mek niin Chairperson Er. Benjamin L. Tlumtea chuan a sawi a ni. Pisa nghet nei thuai se, ka ti hle mai.
Tuna kan hotute chu:
1) Chairperson : Er. Benjamin L. Tlumtea
2) Asst. Chief Engineer : Er. H. Thanthianga
3) Asst. Secretary : Pi Lalchanchinmawii
5. Assistant Chief Regulatory Affairs: Pu Lalremruata Sailo
6. Principal Private Secretary to the Chairperson: P i K. Lalremsangi
Heng hotu lawk 6 hian Mizoram Electricity Regulatory hi an khai ding mek a ni.
MZERC hnapui ber chu:
Mizorama Power thatna tura enkawl leh chêt veltir(regulate) a ni a. A bikin Electric man (Tariff) bithliahtu, thuneihna sâng tak nei Statutory and Quasi Judicial Body a ni a. Power and Electricity Department rawtnate chu tul a tih chuan a lo pawmin a lo pawm lo thei a ni. Thutâwp neitu a nih chu! Ministry thuneihna pâwnah hna a thawk a ni. Electric Consumer-te hamthatna ngaihtuahtu leh electric consumer-te zualkona a ni a, Ombudsman pawh Asst Chief Engineer a ni a, ani hnenah hian harsatna nei te chuan complaint theh luh theih a ni. Commission a nih angin MZERC kan belhchian a tul hle a ni.
Hman ni lawk, 19 March 2026 pawh khan State Advisory Committee thut khawm MZERC hian a ko a. SAC hian Power lama Mizoram hmasawnna tam tak kawng hrang hrangin an ngaihtuahin an sawi ho nghe nghe a ni. Commission hian Power hmangtute tan tariff a bithliahsak leh a ni.
MZERC hi in tin leh chhungkaw tin tlawh chhuaktu a ni a, lo kawm ngeih hi kan tih mâkmawh a ni e. Hnam fing nih i duh chuan he Commission hmalaknate hi ngaihven rawh. Mit khap kâr lek power neih loh pawh hrehawm kan tih thin êm hi maw!
“Hriat loh hi ngaihdam theih a ni lo”
– Keimah Activist.