MZP Gen. Hqrs chuan MZP hnuaia hnampual zirlai pawl, College Students’ Union leaders, MZU Students’ Council leh Students’ Bar Council hruaitu zinga college degree nei tharte pualin Thawlehni khan a lawmna an buatsaih a. Degree nei thar mi 88 hnenah lawmpuina thuziak hlan a ni.
MZP president H Lalthianghlima chuan, institution hrang hrang leh hnampual zirlai pawlah nasa taka inhmang chung a, mahni zirlai tha taka an zo thei chu fakawm a tih thu sawiin, MZP-in a lawmpui em avangin hetiang hun hi buatsaih a ni tih a sawi. An thiamna leh finna hmang tangkai tur leh, an tawnhriat chu hna zawnna piahlamah ram leh hnam tana hmang turin a fuih a ni.
“Zofate chu khawi hmunah pawh awm ila, hnam anga dingchhuak tur chuan inpumkhat a pawimawh ber. In enhrang tur kan awm lo. Chu chu zirlai hruaitu hrang hrangte hian chhawmnung tlat ang u,” a ti.
Mizoram-in airport a neihchhun Lengpui Airport chu midang kuta hlan a him loa, eng dinhmunah pawh ding ila, sawrkar kuta a awm a tha ber tih MZP president hian a sawi bawk.
MZP-in degree nei thar lawmpui
