India rama zirna kalphung siamthat duhna avanga punkhawm huaihawt kal zelah Ningani khan Mizo Zirlai Pawl chuan Aizawl leh Mizoram hmun dangah tharum tel lo punkhawm an huaihawt a. Mizo zirlaite himna leh hamthatna atan zirlai leh thalaite lungrual taka thawhho zel nise an duh tih an sawi.
MZP Gen. Hqrs. huaihawta Aizawla punkhawmah an president C Lalremruata chuan, kumina NEET-UG exam zawhna putru avang khan Mizo zirlai 2000 velin indirect takin an tawrh phah a, he thil thleng hi a demawm takzet a, sawrkar laipuiin hma la ngei se, zawhna putru duh lohna lantira hmalakna hrang hrang chu an thlawp tih a sawi.
MZP hruaitu chuan, zirlaite leh mipui tam takin an thahnemngaihna leh duhkhawp lohna thawm an hriatin thupha an chawi tih a sawi a. An tling tawk lohna leh insiamthat leh thurawn pek dawnsawn an inhuam reng tih a sawi bawk.
Ningani vek khan MZP Hqrs Lunglei leh MZP Hqrs. Serchhip pawhin an huamchhungah punkhawm an huaihawt a. Lungleiah hi chuan zirlaiten kawng an zawh a ni.
MZP hian resolution an siam a. NEET (UG) 2026 exam-a zawhna putru chu an dem takzet tih sawiin, a thlen nawn tawhlohnan sawrkar laipuiin hma la turin an phut a. NEET zawhna putru avanga an zirlaipui nunna chan ta te an tawrhpui takzet a, sawrkarin zangnadawmna pe ngei turin an phut tih an sawi.
Exam dan kalphung langtlang leh tha zawk neih a nih theihnan National Testing Agency (NTA) siamthat nise; he thil thleng avanga peaceful protester-te chunga police-te tharum thawhna thleng chu an dem takzet a, democracy ramah hetiang hi thleng nawn tawh lo se an duh tih an sawi a ni.
Tihluihna hmanga he protest hmahruaitu Sonam Wangchuk, sawrkarin Safdarjung Hospital-a tihluihna hmanga a hreng lui chu an dem takzet a, thu tiamkam awmloa chhuah nghal turin an phut tih an sawi a. Mizo zirlaite himna leh hamthatna atan Mizo zirlai leh thalai kalkhawmte lungrual taka thawhho zel nise, an ti bawk.
MZP-in lungrual taka thawhho an duh
