MZU amite hnenah hlan
Tunhnaiah Mizoram University-a thawk leh zirlai hnenah chawimawina leh lawmpuina sumfai hlan an ni.
Lawrence Ch. Chhunga Memorial Endowment Fund 2025 chu C Zamawia, kum 2025-a English and Culture Studies department MZU-a pakhatna (gold medalist) hnenah hlan a ni.
Lawrence Ch. Chhunga Memorial Endowment Fund hi English and Culture Studies department-a retired professor Margaret Ch. Zama’n a pa, Mizoram chief minister hmasa ber Lawrence Ch. Chhunga (L) hriatrengna atana a pek a ni a. Endowment fund hi kumtin English and Culture Studies department MZU-a MA gold medalist hnena hlan thin a ni.
He programme-ah hian kum 2025-a gold medalist C Zamawia hnenah, endowment tumtu Prof. Margaret Ch Zama hian sumfai Rs. 43331 leh lawmpuina certificate hlanin, zirlai kalkhawmte chu zirna lama tan la a, thu leh hla lama hma sawn zel turin a fuih.
MZU Department of Botany-a thawk lai Prof. Awadesh Kumar hnenah ‘Fellowship of the Indian Botanical Society (FBS)’ hlan a ni bawk.
XLVIII All India Botanical Conference of the Indian Botanical Society leh The International Symposium “Biology and Biotechnology of Plant Diversity for Bioeconomy” programme hmannah Prof. Awadesh Kumar hi he chawimawina hlan a ni a, Padma Shri Prof. Sudhir K. Sopory chuan a hlan.
The Indian Botanical Society hi Botany leh Plant Science zirna huang chhungah chuan pawl hlun ber zing ami a ni. Kum 105 din kum lawmna an hmang nghal a ni. Prof. Kumar hi a zirchianna leh a thiamna huangchhunga hmasawnna kawnga a thawhhlawkna avangin award hi pek a ni.
MZU amite hnenah hlan
