Mizoram University hnuaia pawl 5 – Mizoram University Students’ Council, Mizoram University Research Scholars’ Association, Mizoram University Alumni Association, Mizoram University Teachers’ Association leh Mizoram University Non-Teaching Employees Association chuan research scholar pakhatin Meitei hel – Arambai Tengngol tana sum a tuak nia hriat chu pawm theih a ni lo tih an sawi.
Thuchhuah intawm an siamah heng pawl panga hian, Manipur buainaa remna leh muanna a thlen theih nan theihtawp an chhuah tih an sawi a. 2023 May 3-a Manipur-a chi leh chi buaina chhuah hnu ah MZU-a hnam chi hrang hrang awmten tharum thawh a nih lohna tura hma an lak bakah thuchhuah intawm siamin, remna a awm theih nan intawhkhawm an huaihawt a. Hetihlai laia MZU Department of HAMP-a Ph.D scholar Teresa Ningthoujam-in Arambai Tengngol tana social media lama sum a khawn chu pawi an tih thu leh MZU campus-ah hnambil thila boruak tha lo a thlentir chu pawi an tih thu an sawi a ni.
MZU hnuaia pawl hrang hrang chuan zirna sang zawka zirlaiin hetianga hnam bil khawih thei thil zawnga hma a lakna chu an dem tih sawiin, ‘University campus-a hetiang thil thleng hi kan duh loh bakah thil thleng tura ruat ngai loh a ni a; MZU chhunga remna leh muanna a awm theih nan theihtawp chhuah kan tum a, zirna hmun leh a kaihhnawihah hetiang hi thleng tawh lo turin kan duh a ni,’ an ti.
MZU hnuaia pawl panga-in Meitei nu chetdan tha ti lo
