MZU-in convocation an hmang

Mizoram University (MZU) chuan anmahni campus Tanhrilhah Inrinni khan Convocation vawi 20-na an hmang.
Convocation hmanpuitu Vice President of India CP Radhakrishnan chuan, India hmarchhaka thiamna sang zawk zirna in tha leh campus nei tha ber zing ami Mizoram University-a convocation a hmanpui thei chu lawmawm a tih thu sawiin, hlawhtlinna changte a lawmpui a, an phena awm nu leh pa leh zirtirtute fakawm a tih thu a sawi. Degree chu zir zawh entirna certificate ni mai loin, hmathar lakna tur entirna certificate a ni tel tih a sawi a ni.
India rama remna thuthlung ziah hlawhtling ber zing ami – Mizoram Peace Accord 1986 chuan dawhkan hmangin inremlohna chinfel theih a nih zia a lantir, tiin, zirna than zelna atan muanna a pawimawh a, hmasawnna atan ram ralmuang nih a tul tih a sawi. Act East Policy-in hmarchhak state-ah danglamna nasa tak a thlen a, Asia chhim chhak ramte luhka pawimawh tak a nih tir tih a sawi a. Prime minister kaihhruaiin hmarchhak chu India rama hmasawnna bung pawimawh a ni tih a sawi.
Thalaite chu hna zawngtu nih ngawt tum loa, a siamsaktu nih tum a, remchanna zawngtu aia siamsaktu nih tum turin CP Radhakrishnan hian a fuih a. Hmarchhak state-ten theihna nasa tak an nei tih sawiin, thalaite hmelma lian ruihhlo erawh nasa zawka do tlan a tul tih a sawi. Zirlaite chu a eng zawnga hmalam thlir a, tunlai thiamna chhuak thar apiang thiam bel tum a, hun vawng dik a, social media hman chin tawk hre turin a chah bawk.
MZU chief rector, larsap Gen. Vijay Kumar Singh (Retd) chuan, convocation chu kum engemawchen inthununna, beih hram hramna, hmasawnna leh tumruhna a taka lan chhuahna hun a nih bakah hmasawn zel tura bultanna thar a ni tih a sawi.
MZU-in kawng hrang hranga hmasawnna hmu in, tun dinhmunah hmarchhak state-a zirna sang zawk zawm theihna ngaihhlut leh thang duang ber zinga mi a ni tih a sawi. Mizoram University-in NAAC A+ grade a hmu chu lawmawm tiin, zirna bakah vantlang rawngbawl kawnga hma a lakna fakawm a ti a. Degree chuan mawhphurhna a kengtel tih sawiin, an thiamna leh finna chu midang rawngbawl sakna atan hmang turin a chah.
Chief minister Lalduhoma chuan convocation hmanpui tura lokal Vice President chungah lawmthu a sawi a. Zirna tihhmasawn kawnga Mizoram sawrkar hmalakna a sawi. University naupangte ni chunga Mizoram University-in NIFR 2025 ranking-ah India rama university tha 82-na a hauh pha chu chhuanawm a tih thu sawiin, hetiang dinhmun thleng thei tura thawktute chungah lawmthu a sawi a ni.
MZU registrar Prof. Lalnundanga chuan vice chancellor phalna laa convocation tan theih thu a puanfel hnuah MZU vice chancellor Prof. Dibakar Chandra Deka chuan inlawmna thu a sawi a. Degree, gold medal leh book prize winner lawmman hlan a ni.
MZU Convocation-ah hian MZU hnuaia zirlai 6385 hnenah degree hlan a ni a. A hmuna inlan 1113 zinga Doctor of Philosophy 147, Master of Philosophy 3, master’s degree 486, master’s professional 137, bachelor’s degree 121, bachelor’s professional 174, gold medalist 43 leh book prize dawngtu 2 an awm.
Mizoram University hi kum 2001 a din a ni a, tunah department 39 a awm. Centre pahnihin School of Study 10-ah UG, PG leh Ph.D programme an kalpui mek a. Affiliated college 40 leh constituent college 1 a nei.