MZU zirtirtu laka zirlaite complaint
thehluh bawhzui chak turin MZP-in ti
Mizoram University Economic department zirtirtu lakah a zirlaite atangin danin a phalsak zulzuiin complaint thehluh a ni a, hmalakna a awm loh avangin Mizo Zirlai Pawl chuan vice chancellor hnenah bawhzui chak turin an ngen.
MZP Gen. Hqrs. hruaitute sawi danin, MZU Economic department-a associate professor Dr Akshaya Kumar Mohanty chu 2024 June 16 khan MZU registrar kaltlangin zirlai 20 chuangin zirlaite chunga a chet thin dan avangin MZU zirlaite harsatna thlenna hmun tur Students Grievance Redressal Committee (SGRC) ah lungawilohna an thehlut a. Hemi bawhzuina report engmah a la awm loh bakah zirlai tam tak amah avanga rilru lama harsatna tawk hial leh kut thlak hial a nei tih MZP chuan hria in, hetiang zirtirtu hi Mizoram University-a thawk reng tlakah an ngai loa, zirlaite hmakhua ngaiin vice chancellor Prof. Debakar Chandra Deka chu Nilaini khan a office-ah hmu in, a rang thei ang bera hma lo la ngei tura ngenin a hriattir a ni.
‘MZU-a zirlaite harsatna thlenna hmun SGRC-in hmalakna report a la neilo hi hriatthiam har kan ti a. A rang thei ang bera Dr Askhay hian a phu tawk hremna a hmuh theihna turin vice chancellor hi hma la turin kan ngen a; February 2025 chhung ngeia hmalakna a awmlo a nih chuan na takin MZP chuan hma kan lak chhunzawm dawn a ni,’ an ti.
MZU zirtirtu laka zirlaite complaint thehluh bawhzui chak turin MZP-in ti
