Nadal-a’n Tennis a chawlhsan ve ta

A lo puan lawk tawh angin Rafael Nadal chuan Davis Cup-ah Netherlands hneh lova an tlak hnuin Tennis a chawlhsan ta.
Grand Slam-ah vawi 22 zet champion a, mipa lama champion tam ber dawttu ni mek Nadal hi a uaithlak lamah hliamin a tibuai a, kum hnih dawn chu harsatna a tawk tawh. Kum 2024-ah inelna hmachhawn thei mah se beisei a phak tawh lo va, inelna lianah a thleng sang thei tawh lo. A ropuina hmun French Open first round a paltlang zo lova, Alexander Zverev lakah set la lovin a tla nghal. French Open atanga a tlak rual hian in mangthana chetzia in a lantir nghal a. Mipui tam takin ui tak chungin an thlah bawk.
French Open 2024 first round-ah a tlak hnuin Nadal hian Olympic a hmachhawn zui leh a, second round-ah a elpui lian Novak Djokovic a hmachhawn a, set la lovin a tlawm zui leh. Olympic atanga a tlak hnuin a chawlh zui rinna lian tak a awm. Nadal a tawngchhuak mai lo thung. Season tawp lama ram inelna Davis Cup finals-ah Spain ai a awh zet phawt a. He inelna atanga an tlak rualin Tennis a chawlhsan tur thu a sawi a. Davis Cup khelh hmain Saudi Arabia-ah Six Kings Slam a hmachhawn leh a, a elpui lian Novak Djokovic hneh loin palina a ni..
Davis Cup-ah Netherlands hneh lova an tlak hnuin Nadal chuan tang leh chak tum tak chunga a khel chungin a chauh lem loh thu a sawi. Inelna hautak hmachhawn zui turin a chakna in a tlin tawh bik lo thu a sawi thung. Tennis a khelh chhunga a hlawhtlinna zozai chu vohbik chanvo, chanvo ropui tak nia a hria thu sawiin, player anga Tennis khawvel a mangtha thu a sawi.
Rafael Nadal
Tennis ngainatute tan Rafael Nadal hi tunge tih zawh buai tam a ngai lo. Player fit bawn turu, chau ve thei ngai lo emaw tih hial tur a ni a, Court chhung khawi hmun mai pawh a thleng zung zung thei zel a, a beidawng ve mai mai ngai lo. Thahrui a ngah tluk zetin a huaisen a, a paukhauh bawk. Chutiang mi chu a nih miau vangin Tennis player ropui ber zingah a tel a, Tennis khawvelin Nadal a theihnghilh leh tawh ngai lo ang.
Nadal hi June 3, 1986 khan Mallorca, Spain-ah Rafael Nadal Parera tih hming puin Ana María Parera Femenías leh Sebastián Nadal Homar te inakarah a piang a. A pa hi sumdawng niin a nu hian perfume dawr a nei thin. A pa unau te zinga pakhat Miguel Ángel Nadal chu professional footballer niin RCD Mallorca, FC Barcelona leh Spanish national team tan a khel thin. Nadal ngei pawh hian football a ngaina hle a, FC Barcelona forward Ronaldo a ngaisang thei hle. Hetihlai hian a pa unau zinga pakhat Toni Nadal chu Tennis coach a ni ve thung. Ani hian Nadal hi kum thum mi lek a nih laiin Tennis a khelhtir tan a. Kum thum mi lek a nih laiin Nadal hian Tennis zin kawng a zawh tan tihna a ni.
A pate-a kaihruaina hnuaiah Manacor Tennis Club tan Nadal hian a khel a, football thiam tak ni bawk mah se Tennis-ah a ring a rawlh thuk ta zawk. A pian a thain thahrui a ngah bawka Tennis a khel thei ta viau. Kum 1997 leh 1998 khan Spanish junior championship-ah a champion ta hial a ni. Spain ram chhunga inelna hrang hrangah a hming a chher hnuin kum 2001 khan kum 14 mi ni chungin professional Tennis a luhchilh tan. Inelna hrang hrangah chetha chho in, US Open first roud paltlang thei naupang ber te a ni chho ta hial a. Kum 2004 khan Davis Cup-ah Tommy Robredo nen inkawpin an champion a, professional huanga a title hmasa ber a la.
Kum 2005 a lo inherchhuak a, French Open-ah Nadal ropuina a intan. French Open 2005-ah ropui takin a champion a, a vawi khat nan Grand Slam-ah a champion. Clay Court-ah a khel thiam vui ta viau a, French Open-ah hian kum li chhung a champion zawn a. 2009 ah champion lo zeuh mah se 2010 atanga 2014 thleng a champion zawn leh. Kum 2016-ah champion zo lo mah se 2017, 2018, 2019, 2020-a a champion zui leh a, French Open-ah hian a tawp nan 2022-ah a champion zui leh bawk. French Open-ah hian vawi 14 zet a champion a. Tennis player zingah Grand Slam pakhata champion ngun ber record a siam.
French Open-ah vawi 14 zet a champion bakah hian Australian Open ( (2009, 2022) leh Wimbledon (2008, 2010)-ah vawi hnih ve ve a champion a. US Open-ah vawi vawi li (2010, 2013, 2017, 2019) a champion zui leh bawk. Nadal hi Tennis player zinga ngainat hlawh ber Roger Federer kawngdaltu lian tak a ni a, final-ah Federer hi a hneh fo. Grand Slam-a champion ngun ber Federer record khum mipa zingah Grand Slam-ah vawi 22 champion thei hmasa ber a ni a. Mipa lamah Grand Slam-a champion ngun ber record thar a siam bawk. He a record hi Grand Slam-a vawi 24 champion tawh Novak Djokovic-a’n a rawn khum ve leh thung.
Grand Slam-ah vawi 22 zet a champion bakah Nadal hian Spain chu inelna lian hrang hrangah a champion pui bawk. Olympic single-ah Gold Medal a la a, Doubles-ah Gold Medal la bawkin hlawhtlinna sang a chang. Mimal angin Nadal hian professional huangah vawi 1080 hnehna a chang a, tlawm zawkah vawi 227 a tang ve thung. Chawlhkar 209 chhung zet World No. 1 a ni hman bawk. Mimal a hnehna a chan zat hi 82.6% zet a ni. Mimal inelnaa title a lak zawng zawng hi 92 zet a ni. Inelna hrang hrangah chetha in, champion deuh vek mah se ATP Tour final-ah vawi khatmah a champion lo teh tlat a. ATP Finals-ah hian final vawi hnih lut bawk mah se tlawm zawkah a tang ve ve.
Nadal hian Tennis khawvelah player anga hun a hman chhungin heng chawimawina hrang hrangte hi a dawng. ITF World Champion (5): 2008, 2010, 2017, 2019, 2022, ATP Player of the Year (5): 2008, 2010, 2013, 2017, 2019, Laureus World Sports Award for Breakthrough of the Year: 2006, 2014, Laureus World Sports Award for Sportsman of the Year (2): 2011, 2021, BBC Sports Personality World Sport Star of the Year: 2010, Davis Cup Most Valuable Player: 2019, ATP Newcomer of the Year: 2003, ATP Most Improved Player of the Year: 2005, Stefan Edberg Sportsmanship Award (5): 2010, 2018, 2019, 2020, 2021, ATP Arthur Ashe Humanitarian of the Year: 2011, ATP Comeback Player of the Year: 2013 leh ATP Fan’s Favourite Award: 2022.
Tennis player ropui tak tak an her liam tawh a, Davis Cup 2024 khel zawh rualin Rafael Nadal a her liam ve leh ta a. Nadal a chawlh tak vangin Tennis khawvel a khawhar leh zual ngeiin ang. A bikin Nadal leh Federer tantute tan a khawharthlak leh zual ang.