Nagaland dy. CM-in lawmpui Ramri hung kan pawm bik lo

Nagaland dy. CM-in lawmpui
Ramri hung kan pawm bik lo
Nagaland deputy chief minister Y. Patton chuan Thawhtanni khan Mizoram chief minister Lalduhoma chu a chenna bangla-ah tlawhin lawmpuina a hlan.
Nagaland deputy CM chuan Mizoramah sawrkar thar chak tak a siam avanga a lawmpui thu a hrilh a. Naga leh Mizote chu thlahtute atanga unau leh inhnai tak nia kan lan avangin an tan pawh chief minister a ni tih Lalduhoma hi a hrilh. Lengpui a lo thlen atanga Aizawl khawpui chhung a kal tawhna chinah Mizoram mipuiin a kaihhruai sawrkar an thlawp tha hlea a hriat thu leh an hlim hle nia a hmuh thu a hrilh bawk.
Myanmar leh India ramri hung chu Naga mipui tan pawh thil pawm theih loh a ni tih Y Patton hian sawiin, “Naga mipui zatve deuhthaw hi Myanmar-ah an cheng a, tuna kan ramri hman mek kana in leh lo sa, an chenna in pindan thenkhat India lama awm, a pindan dang thenkhat Myanmar lama awmte pawh kan nei. Chuvang chuan Naga mipuiin ramri hung hi kan remti thei ngai dawn loa, in dinhmun leh kan dinhmun hi thuhmun reng a ni,” a ti.
Mizoram chief minister chu Nagaland-a zin tura sawmin, Nagaland hian Mizo chief secretary pathum leh addl. chief secretary pakhat an neih tawh thu te a sawi. “Chutiang khawpa inpawh chu kan nih avangin i rawn zin ngei hi kan beisei a ni,” a ti. Chief minister hian tihhlawhtlin sak ngei a tum thu a hrilh a ni.
An inkawmnaah hian hmarchhak state-ten hma an sawn zelna tura hma lak tul nia an hriat, a tul anga thawhho dan tur, tunhnaia chief minister-in Delhi a tlawh chungchang leh thil pawimawh dang an sawi a ni.
Nagaland deputy CM hian chief minister hi Naga traditional dress leh an pasalthate ralthuam leh incheina a hlan a ni.
Thawhtanni tlai vek khan BJP Mizoram State office-ah 2023 MLA inthlanpuia BJP ticket-a MLA-a mi pahnih thlantlin an nih avanga lawmthu sawina Y Patton hian a hmanpui a ni.