Nakum Paris Olympic Games-ah Russian leh Belarusian infiammite inlan loh hmel

Nakum Paris Olympic Games-ah Russian leh Belarusian infiammite inlan loh hmel
Russia-in Ukraine a run chuan nakum Paris Olympic Games-ah pawh nghawng a nei zui zel dawn niin a lang a, Ukraine do kawnga inthurual ram pahnih Russia leh Belarus atanga track and field athlete bikte chu Paris Olympics-ah hian an tel a rin loh thu World Athletics president Lord Coe chuan a sawi.
August 19-27, 2023 chhung hian Budapest khawpuiin World Athletics Championships 2023 a thleng dawn a, chumi behchhana media a hmachhawnah Seb Coe hian a rin dan a sawi a, Russian leh Belarusian track and field athlete-te tan chuan nakum Paris Games hi beisei chi ni dawnin a lang lo!
Kum 1980 leh 1984 Olympics 1,500m intlansiaka gold medal awrhtu Lord Coe hi tunhnaiah track and field governing body hruaitu lawk ber ni turin a vawithumna leh a tawpna atan thlanchhuah leh a ni a, council thar thlanchhuah nena World Athletics a hruai tan lehnaah nakum Paris Games chungchang a sawichhuak a, Russia leh Belarus hremna hnukkirlehna kawng awmchhun chu indona titawpa remna an siam hunah chauh niin a sawi.
World Athletics hi Ukraine run kawnga inthurual ram pahnih lakah hian a khauh hle a, an huang chhung inelnaah reng reng tel ve an phalsak lo a, infiamna dangahte chuan neutral flag hnuaia Russian leh Belarusian athlete-te tel phalsak an ni thin a, mahse, World Athletics hi chuan an hnuaia intihsiakah reng reng an tel ve a khap bur.
International Olympics Committee (IOC) lam chu an thiangzau zawk a, ram pahnih infiammite chu neutral athlete nihna nena tel ve a rawt thung.
Hetih lai hian two-time British Olympic champion Lord Coe chuan ram pahnih track and field athlete-te laka World Athletics dinna chu a chiang tih Ningani khan sawiin, Paris Games-a an inlan a rin loh thu a sawichiang.
IOC lam hian Olympic atan an duhdan an la final lo a, eng ngaihdan pawh nei se anni lam hi chuan rawtna (reco-mmendation) siam bak tih theih an nei lo a, infiamna mal enkawltute chu infiammite laka tel phal leh phal loh kawnga thuneitu zawk an ni. Entirna’n, track and field lama tute emaw tel ve lo se ti theitu chu World Athletics an ni.
Hei hi thil kalphung a nih miau avangin kum 66 mi Lord Coe thu leh hla hi nakum Olympic-a Russian leh Be-larusian-te inlan dawn leh dawn loh hriltu a ni thei dawn chiang a ni.
International Association of Athletics Federations tih thin kha kum 2015 atangin World Athletics tia thlak niin, he athletics thuneitu sang ber hian kumin March thla khan an hnuaia inelna tawh phawta Russia leh Balarus athlete-te tel ve a khap a, hremna hlip tur chuan Ukraine rama remna a awm ngei ngei a ngai tiin thu an dah nghet bur bawk a, tun thlenga inrunna a la tawp loh avangin nakum hian he hremna hi dingtlang ngei tura ngaih a ni.
A tum thumna atana World Athletics president atana thlan thar Lord Coe hian kum 2027 thleng a office a luah chhunzawm dawn a; chumi hnu lamah chuan IOC lam a hawi dawn nia sawirik a nih laiin amah pawhin kum 2025 inthlana IOC president chuh tumna a sawibo lo.