Reuben Lalnunthara Hnamte
Midangte tana malsawmna thlentu nih hlutzia leh pawimawhzia hi hre thin mah ila, mite tana malsawmna ka nih lohzia ka ngaihtuah chang hi chuan hreawm ka ti thin. He thu ziaktu nih pawh hi a zahthlak rum rum nachungin a thu hi a pawimawh si a, insit tak chungin kan thaikawi ve leh zuai a ni. Hringnun rei lo tea kan cham chhung hian mahni tana chakai khawrh ngawt mai ngaihtuahte hi a lo awl khawp mai a. Mahni inhmangaih leh inkhawngaih pawh hi a awl viau mai. Mihringte hian mahni theuh hi inhmu chiangin Paula ang hian he kan hringnun hi kan thuhnuaiah dah ve thei ila chuan khawvel hi innghirnghona leh buaina awm lovin zalen leh nuam deuhin kan hmang mai tur a nia. Nimahse, chaponate, mahni inhmangaih luat avang hian he khawvel hi indonna leh innghirnghonain a khat zo ta a ni ber mai. Chapona hian hringnun engkim hi a tibuar chuara, buaina leh chhiatna mai loh chu hrin a nei lo. He thawnthu tawite hi ilo en ho hmasa ila:
Miami khawpuia in tur leh ei tur zawrhna dawrah pa hausa tak mai hi a zuk lut a. A luh rual chuan kil khata mihang nu pakhat lo thu ngawi reng hi a zuk hmu a. Chu pa, midum hmusit rilru em emtu chu bar-ah chuan han kalin a pawisa ip chu a han phawrh a. A nghaktupa hnenah chuan, “He dawr chhunga awm zawng zawng, sawlai kila mihang nu tel lo zawng hian in tur leisak ka duh a, rawn sem vek rawh le” ring leng lawng chuan a han ti a… Bar nghaktu chuan pawisa a dawng fel te te a, a tirhkah te chu in tur a semtir ta hlawm a. Chu mihang nu chiah chu an sem ve lo ta ngei a…. Mihausa pa chu intivei tak chuan a han hawi kual a, chu mihang nu chu hmusit takin a han en a. Mahse chu nu chuan thinrim hauh lovin leh nui sak chungin chu mihausa pa chu a en a, zaidam takin “Ka lawm e” a ti sap a.
Chupa chu a thin a rim ta tlat a. Pawisa phawrh belh lehin bar nghaktupa hnenah chuan a aia ringin, mihang nu hriat ngei ngei tur bawkin “Dawr chhunga awm zawng zawng, mihang nu tiam lo hian in tur, a bur theuhin ka leisak leh dawn a, eitur pawh ti tel tawh ang che” a han ti leh a…Bar nghaktu chuan a pawisa chu lain tirhkah te chu ei tur leh in tur chu a semtir leh a… Chu mihang nu tiam lo bawk chuan… Mahse… A ngai bawkin chu mihang nu chuan mihausa pa chu a en a, nui chung bawkin “Ka lawm e” a ti leh mai a. Chu mihausa pa chu thinrim takin bar nghaktu bulah chuan a han kal a. “Saw mihang nu saw enge a awmzia ni ngai? Ka hmuhsitna te, ka thliar hranna te ka tihlan nasat nen.. Engahmah a ngai reng reng lo. Lawmthu min hrilh zawk letling ania!!! Mi ã em ni a nih?” a ti ta a. Bar nghaktu pa chuan chu mihang nu chu a va nuih sak a.. Mihausa pa bulah chuan, “Â tehlul love… He hmun neitunu hi a nia.. I lei tam poh leh a tangka ip i thun puar belh zel a, lawmthu a hrilh reng ang che chu,” a ti ta a.
Chapona hian keimahni bak min ei chhe lo… Midangte tihnat kan tum hian a sawhkhawk hi keimahni ah a na ber zawk zel. Ngaihdamna, hmangaihna leh duhsakna kan pek chhuah hian, a dawngtu aiin a petu hi kan hlim zel zawk a lo ni. I pekchhuah ang zel i dawng thin a nia. I dawn duh ang chauh pe chhuak thin ang che. Midangte tana malsawmna nih hi a va hlu em! Midangte hi kan mammawh dawn lo emaw kan tih hi alo ni hauh lo; thil hi a her a her a, mamawh hun mak deuh hian a lo herchhuak tlat zu nia. Pathian thu reng reng hi mahni tana chakai khawrh ngawt a ni lova, midangte tan a ni zel a. Lal Isua pawh kha he khawvela a cham chhung khan a hun tam ber kha midangte tan a hmang a, midangte a hmangaih avangin tuarna nasa tak a paltlang a ni. Kan mihringpuite chhe taka intih hi a lo tha lo hle mai a, boruak chhe tak hi pumpelh tum hram hi a lo pawimawh a ni.
Mihring tu mah hi kan vul rei lo; dinhmun thaa kan din chhungte hi a rei lo, kan dinhmun tha avanga midangte deusah leh chungtlak zawnga tih te hi pumpelh atan a tha viau mai. Thuneihnaa midang hneh chhuh tum hi a lo tlo lovin, an rilru kan hliam a ni lek thin. Mi rilru kan hmin loh chuan kan thuneih hun chhungah inlek viau kha, kan nih loh hunah kan tan chhiatna a ni thei. Chhungkaw pa ber pawh hi a inlek viau a, nupui fanau a tihduhdah viau chuan fate an lo puitling chhova, thuneihnaa kan hneh theih loh hun a thleng mai thin. Chapona hi Pathian pawhin a duh loh, mihring min eichhetu, mi te nuihzabura min siamtu a ni a, eng thil tha mah hi a pawchhuak lo hle. Hitlera pawh kha a hun lai chuan a ropuiin midangte chunga leng leh mi hlauh rawn a ni. Juda maktaduaih tam tak a tihlum a, a thuneihna a hmang sual nasa hle mai. Mahse, a hun chhung a rei lo; tun thlenga mite thinlunga a thu a sawi dan hi chu a duhawm loh khawp mai. Kan hun laite, kan vanglaite hi chatuan daih tur emaw hi kan ti a, a rei si lo a nih hi.
Abraham Lincoln, America President ropui khu chu mi thinlungah hian khawvel awmchhugin a tha zawnga theihnghilh a ni ngai dawn tawh lo a ni. Mite thinlungah hian a tha zawngin hriatreng kan ni em tih hi inngaihtuah hi a pawimawh viau. Mi famkim lo kan nih chu hre mah ila, midangte tana thil tha kan tih erawh theihnghilh a ni ngai lovang. Inneihna te pawh hi nula tlangval induhtawnna leh inhmangaihna atang lo chuan a tlo thei lo va. Hausakna sum leh pai avang emaw, hmel mawina leh thuneihna vang emawa inneihna chuan rei a daih lo chawk; inthen kher lo pawh ni se, inpumkhatna tha a awm ngai lo. Chhungkua a kehchhia a, fanauten an tuar thin. Midangte tan malsawmna i lo ni tawh ngai em? Mi thinlungah hian eng angin nge i thu i sawi ve ang le? Ngun taka ngaihtuah chunga hringnun damchhung rei lo te hi kan hman a va pawimawh em!