Napoleon-a pistol pahnih lilam

French emperor Napeoleon Bonaparte pistol pahnih te inthah tum nana a hman tawh ni bawk te chu lilamnaah 1.69 million Euros a lilam a ni.
He ralthuam hi Paris gunmaker Louis-Martin Gosset siam niin lilam a nih hmain 1.2 million atanga 1.5 million Euros vela lilam theih a nih beisei a ni a.
Napoleon-an kum 1814-a inthah a tumna Fontainebleau palace bul lawka Osenat auction house-ah pistol te hi lilam a ni.
Heng pistol pahnih te hi France culture ministry chuan national treasurer tia a puan niin ram danga thawnchhuah khap bur a ni thung a.
Hei vang hian French sorkar chuan he ralthuam neitu thar hnenah hian dan angin thla 30 chhungin a leisak a ngai dawn a. Pistol te hi hun eng emaw ti chhung bithliahah chauh France a chhuahsan phal a ni bawk. Pistol te hi gold leh silver a chei niin Napoleon thlalak a chuang bawk a.
Heng pistol te hmang hian foreign sipai ten a sipaite an hneh avanga a thuneihna a kiansan a ngaih zan 12 April, 1814 khan inthah tum nan a hmang tia sawi a ni a.
Mahse, a grand squire Armand de Caulaincourt chuan silai atanga silai zen te a lo bunruah vek avangin Napoleon chuan tur a ei ta zawk a, mahse, a dam chhuak hlauh thung a ni.
A hnuah Napoleon chuan silai te chu Caulaincourt hnenah pe in, anin a thlahte zel hnenah a hlanchhawng zui ta zel a ni.
Pistol bakah hian pistol original box leh accessories hrang hrang powder horn leh powder tamping rods te pawh a keng tel bawk a.
Napoleon kha Mediterranean island Elba a tantir a nih hnuah kum 1815 khan thuneihna a chang leh a, mahse, Battle of Waterloo ah hnehin a awm ta a ni.
South Atlantic a St Helena island-ah tantir leh niin kum 1821 khan a thi ta a ni.