Social Welfare, Tribal Affairs, Women & Child Development department buatsaihin Mizoram kohhran hrang hrang hmeichhe hruaitute leh hmeichhe tlawmngai pawl chuan kohhran leh inchhungkhur theuha ruihhlo do kawnga hmalak dan tur leh enkawl dan tur zirho leh inrawnkhawmin Thawhtanni khan an inhmukhawm. Social Welfare minister Lalrinpuii’n a hmanpui.
Social Welfare & TA director Dr Lalhriatzuali Ralte chuan ruihhloin a bikin naupang a run nasat tawh zia, chhungkaw nun atanga inzirtirna bul tan a pawimawh dan, ngawrh lehzuala ruihhlo do hna thawh a tul zia te a sawi a. MSD&RB chief executive officer Lalhlupuii Sailo chuan Mizorama naupang leh ruihtheihthil inkaihhnawihna (child drug survey) chungchang sawiin, MSD&RB atang tho in Vanlalhruaii’n kohhran leh pawl theuha ruihhlo do leh ruihhlo hmansual laka invenna kawnga hma lak dan tur a sawi a ni.
Mizoramah kum 2022-a school 122-a zirlai 10733 (kum 10 -17) zirchiannaah ruihtheihthil eng chi pawh vawi khat tal ti tawh an awm em, tih zawhna chhanna atanga a lan danah high school leh higher secondary school zirlai aiin middle school kal zingah ti an tam zawk a. He zirchianna atang hian rilru hriselna leh chhungkaw khur boruak leh zu/ ruihhlo inkaihhnawihna, naupang ruihtheihthil khawihten puitling ruihtheihthil khawih ang tho an hmang tih te sawi a ni.
Inrawnkhawmnaah hian Central Kohhran Hmeichhia (Mizoram Synod), Mizoram Baptist Kohhran Hmeichhe Pawl, Women Ministry (Salvation Army), Diocese Catholic Hmeichhe Pawl, General Ladies Auxiliary Department NEI – UPC, General Ladies Auxiliary Department Mizoram UPC, Lairam Isua Krista Baptist Kohhran Hmeichhe Pawl, Women Ministries Mizo Conference of Seventh Day Adventist, Evangelical Church of Maraland hmeichhe pawl – Krizypa No Py bakah MHIP leh MChP Gen. Hqrs hruaitute an tel.
Social Welfare minister thusawi:
# Ruihhloin khawtlang nun a tha lo zawnga a nghawng nasat zia leh, ruihhlo avanga thi an tam dan, naupang zingah ruihhlo ti tan an pun belh dan leh ruihhlo man zat a tam zel dan a sawi.
# Heng avang hian ruihhlo do hna ngawrh taka thawh thin chu tha thlah loa nasa zawka hma lak chhunzawm a tul a. Sawrkar pawhin ruihhlo do a ngaipawimawh a, sawrkar leh tlawmngai pawl thenkhat chauh tih tur a ni loa, kan zavai tanrual a pawimawh, a ti.
# Khawtlang nun siamthat leh ruihhlo do kawngah hmeichhiaten nasa takin sul an su kaw thei a. Naupang leh thalai zawkte ruihhlo laka venhim kawnga zirtir turin mawhphurhna sang tak kan nei theuh a ni.