National Highway 54 – Khumtung to Keitum inkar kawng an thawmthat mek hmun thenkhatah contractor-in lung tha lo an hman avangin paihtir an ni.
Serchhip district thuneitute leh MJA Serchhip District chuan Nilaini khan NHIDCL hnuaia Shivalaya Construction Ltd. leh KRAM Infracon Pvt. Ltd. ten NH-54 Khumtung – Keitum inkar kawng an thawmthat mek an enfiah a. Shivalaya Construction Ltd. in Khumtung dai, Serchhip district atanga Baktawng Chan In thlen hma, km.5 thleng kawng an thawmthat chu tha thawkhat hle nia an hriat lain, Baktawng Mualkawi dai atanga Keitum inkar kawng siamtu KRAM Infracon Pvt. Ltd. hnathawh erawh a muangin duhthu a sam lo hle niin an sawi a. Kawng thawmthatna atana lung hmun 5 (truck trip 5) a an chhekkhawl sa pawh quarry lung a nih loh avangin an paihtir lehnghal.
Serchhip district chhunga NH-54 Phase-1 Khumtung leh Baktawng Mualkawi inkar km.5 hna thawktu Shivalaya Construction Ltd. hnathawh hi a tha thawkhat hle tih an sawi a, kumin furah an kawng siam zaa 5 vel chiah thawmthat ngai a awm a, chu chu tha takin an thawmtha mek a, an zo fel khat tawh tih an sawi a ni.
Phase II, Baktawng Mualkawi via Serchhip By Pass Road to Keitum inkar kawng siamtu KRAM Infracon Pvt. Ltd. hnathawh erawh a chhe hle a, kumin fur chhoah an kawng siamsa zaa 80 aia tam mah chu thawmthat ngaiin a chhia a, hei hi an lung hman quality that tawk loh vang nia a lan thu sawiin, enfiahnaah pawh quarry lung ni lo tih hriat ngawih ngawih, leiminna hmun thenkhat atanga an lak lung, truck trip 5 paihtir leh an ngai hial tih an sawi.
Hetihlai hian Phase-III, Keitum leh Bungtlang inkar hnathawktu Bhartia Infra Projects Ltd. kawng siam erawh a tha thawkhat hle a, sawisel tur leh thawmthat leh ngai a awm lo tih an sawi bawk.
NHIDCL hnuaia Baktawng Mualkawi to Keitum inkar kawng siamtu KRAM Infracon Pvt. Ltd. kumin August 7 khan NHIDCL-in ‘warning’ pe in ni 15 chhung (August 22 ral hma) a lirthei kal theih tura kawng chhia thawmtha zo vek turin an hriattir a; Serchhip bawrhsap Paul L Khuma pawhin KRAM Infracon Pvt. Ltd. hi a tul dan azira an chunga ‘legal action’ lakah a lo vaukhan tawh tih sawi a ni.
National Highway 54 siamtu zing ami KRAM Infracon thawk tha lo
