National Highways and Infrastructure Development Corporation Limited (NHIDCL) enkawl national highway-ah thawmthat ngai a tam leh tawh avangin siamtha rang turin chief minister Lalduhoma chuan a hrilh.Thawhlehni khan chief minister kaihhruaiin Mizorama NHIDCL-in kawngpui a sial mek dan a thlirlet pui a; PWD minister Vanlalhlana, PWD leh Power & Electricity hotute bakah NHIDCL hotute an tel.
National highway hoah thawmthat ngai a tam leh tawh a. Lirthei tana tlan harsa khawpa chhia a tam leh tawh tih chief minister hian sawiin, contractor liability period chhung ami vek an la nih angin rang taka thawmthat thuai a duh tih NHIDCL hotute hi a hrilh. Bypass road thar an laih hnua khaw chhung kawngpui, state PWD hnena an la hlan lohte a ranglama hlan a; Aizawl to Vairengte kawng chu ngaihpawimawh bik (priority) a nei turin a chah bawk.
Sawrkar laipuia rigid pavement hmanga kawngpui sial tawh zawk tura a rawtna zirchiang tura hmalakna kalpui rang turin a chah a. Hemi thuah hian Union MoRTH minister Nitin Gadkari chuan Mizorama rigid pavement hmanga kawngpui sial chungchang lo zirchiang turin NHIDCL hi a hrilh tawh a ni.
Thingfala Mamte ‘T’ Baptist Kohhran biak in chim chu chief minister hian a sawi chhuak a. NHIDCL hotute chuan bawrhsap office-in assessment an nei tawh a, an assessment hi Project Management Unit-ah an thehlut tawh a, an ni hian NHIDCL Headquarters lamah an kaltir zel dawn tih an sawi a ni.
Chief minister-in hna hmanhmawh thlak leh ngaihpawimawh ngai bik a sawite chu NHIDCL Mizoram regional executive director Adelbert Susngi chuan chak taka an bawhzui tur thu a sawi.
NHIDCL hian an hnathawhna hmun hrang hranga harsatna an tawh chu chief minister hnenah hian an thlen a. State P&E department nen hmalak ho an mamawhna hmun, ram neitu chiang lo chinfel la ngai, Aizawl Eastern side bypass road laih tura harsatna an tawh, zangnadawmna lama harsatna an tawh hrang hrang, mi thenkhatin kut thlak an phal loh vanga hna an thawh theih lohna hmun leh chak zawka hna an thawh theihnana an mamawh dangte an sawi a ni.
National highway chhia thawmtha rang turin CM-in NHIDCL a hrilh
