National Integration Tour neiin chhuak
Hnam inpumkhatna leh inunauna chawilarna atan Assam Rifles buatsaih ‘National Integration Tour 2025’ a kal tur Lunglei, Siaha leh Lawngtlai district atanga thlan chhuah zirlai 20 leh zirtirtu pahnih bakah anmahni hruaitu Assam Rifles official-te chu Thawhtanni khan larsap Gen Vijay Kumar Singh (Retd) chuan Raj Bhavan atangin a vailiam.
Larsap chuan tour kaltlanga thil zir turte chuan zirna bakah an thanlen zelna kawngah hriatna leh thiamna pein a pui dawn tih a sawi a. India rama khawpui pawimawh tak tak an tlawh tur chu lawmawm a tih thu sawiin, India ram hnam ziarang leh nunphung danglam nasat zia an hmuh dawn avangin zirlaite chu midangte hnam ziarang leh nunphung chika hriatthiam tum turin a chah.
“India ram hnam ziarang leh nunphung danglam nasa em em hi kan chakna leh inpumkhatna atana pawimawh a ni,” tiin, tour chuan inunauna leh inpumkhatna a hrin chhuah ngei a beisei tih a sawi.
National Integration Tour 2025-a kalte hian Guwahati, Amritsar leh Delhi-a hmunhma pawimawh leh hriat hlawh bakah sipai hmun pawimawh thenkhat an tlawh dawn a. He tour kaltlang hian zirlaiten India ram an hriatchian lehzual theihnan India culture, nunphung, thiamna leh ei leh in hrang hrang hmelhriat tir tum a ni. Ruahman dan chuan November 29-ah an rawn let leh dawn a ni.
National Integration Tour neiin chhuak
