Journalist/ press mite tana Press Council of India din champha denchhena hun bik hman – National Press Day chu Ningani khan India ram pumah hman a ni a, Mizoramah pawh Information & Public Relations department leh Mizoram Journalists’ Association ten hmangin, journalist-te tana tunlaia hman lar chhoh mek artificial intelligence (ChatGPT adt) thatna leh that lohna zir ho a ni.
Aizawla National Press Day puala hun buatsaih hmanpuitu I&PR addl. secretary V Ruatsanga chuan thuthar thehdarhtute leh sawrkar inkarah thawhhona leh inpumkhatna tha awm zel se a duh tih a sawi a. Ethical journalism, hnam leh hnam innghirnghona awm loa mipui tana thlei bik nei lo leh thudik bengvarthlak chauh chhuah thin turin a chah. Democracy ramah media-te chu fourth estate/ pillar an nih angin kumin MLA inthlanah pawh mipui hriat tur zirtir leh puanchhuah kawngah an thawhhlawk hle tiin, MJA chungah lawmthu a sawi a. Sawrkarin MJA member-te tana ruahmanna a siamte a sawi bawk.
MJA Gen. Hqrs. president C Lalrambuatsaiha chuan National Press Day chu India danpuiiin ramchhung press mite zalenna humhim a nih zel theih nan te, chutihrualin an mawhphurhna leh hmasawnna tur inhrilh leh inzir tharna atante hman thin a ni tih a sawi.
MIRSAC scientist Esther Lalremruati chuan kumin National Press Day thupui ‘Media in an Era of Artificial Intelligence’ tih hmangin zirtirna a pe a. Tunlaia hman lar chhoh tak ni tawh artificial intelligence (AI), online-a information leh tul dang lakkhawmna atana hman chu mipui nawlpui bakah journalist-te tana thil tangkai a nih theih rualin, a famkim tawk lohna leh mihring thluak leh chhia leh tha hriatna nge nge chu chungnung leh rin tur zawk a nih dan, a theihna chin hriata kalkawp pui dan thiam a tul dante zira sawi ho a ni.
National Press Day hi 1966 November 16-a din, ram pum huapa media-te thlungkhawmtu Press Council of India din ni pualin kumtin hman thin a ni a. Kumtin thupui neiin, media-te than chhoh zel dan tur leh hmasawnna tur te, ram rawngbawlna kawnga media-ten hlawk zawka tha an thawh theih dan turte zir ho nan hman thin a ni.
National Press Day hmang AI thatna leh that lohna zir
