Indian Space Research Organisation (ISRO) North Eastern Space Applications Centre leh Mizoram Remote Sensing Application Centre (MiRSAC) tangdun buatsaih National Space Day 2024 chu Thawhlehni khan Aizawlah hman a ni.
ISRO-NESAC Shillong scientist/ engineer Dr Rocky Pebam chuan India ram chu thla leilung thleng thei ram palina a ni tih a sawi a. ISRO-URSC Bangalore sci/eng Dr Senthil Kumar G chuan Moon Mission chungchang, Chandrayan-3 Mission an kalpui dan a lem nen a entir a. Chandrayan 3-ah hian Propulsion Module, Lander Module (Vikram) leh Rover Module (Pragyan) te awmin tunah hian Lander Module leh Rover Module hi thla leilung zirbingna (research) ti tura design a nih angin an awm mek a, Propulsion Module chu thla orbit atangin leia laklet a ni. Khawvel atang hian thla hi km nuai 4 vel niin, Chandrayan-3 hian thla thlen nan ni 40 vel hun a hmang a ni.
India chu USA, Russia, China hnuah thla leilung thleng thei ram palina a ni a. Thla leilung thleng thei ram hian thla leilung atang hian thil tam tak zirbingin, vanthengrenga thildang awm (celestial bodies) awlsam zawkin an zirchiang thei dawn tih sawi a ni.
Hmanpuitu School Education minister Dr Vanlalthlana chuan National Space Day mai ni lo, 2023 August 23-a thla chhimtawpa Chandrayan-3 Moon Lander Shiv Shakti Point-a a tum (soft landing) champha hriatrengna leh lawmna hun hman a ni chu lawmawm a tih thu a sawi a. He hlawhtlinna hian mi tamtak rilru-ah vanthengreng zirbingna (space technology) leh naupang zawkte rilruah vanthengreng hriat chak lehzualna a chawk tho tih a sawi. Van thengreng hriatna chu kan ram pawhin kan hmang tangkai a, a bikin school naupangte thlipui leh ruah laka lo invenlawkna kawngah leh chhiatrupna thleng thei laka lo inralrinna kawngah thil tangkai tak a ni tih a sawi bawk.
National Space Day-ah hian school naupang leh scientist-te an inkawm a; zawhna awmte chhan a ni. He Ni puala quiz buatsaih lawmman sem nghal a ni a. Quiz intihsiakah hian school 25 atangin naupang 2 theuh an tel a. Pakhatna hi Govt. Saitual HSS niin, pahnihna Govt. Mizo HSS leh pathumna Synod HSS an ni.
National Space Day hmang
