Mizoram pumah Mizo nationalism campaign an nei dawn tih MNF Thalai vice president Zodinpuia chuan a sawi a. MNF chu Mizo thalaite tana din a ni tih a sawi.
MNF Thalai vice president sawi danin, Mizo nationalism campaign pualin September 19 hian Aizawlah two wheeler hmangin ‘Mizo Nationalism Rally’ neih tum a ni a. Mizo thalai a duh apiangte tan reels insiamsiak leh college zirlaite tan essay ziaha inelna buatsaih tum a ni. Intihsiakna thupui atan “Mizoram leh hnam tan MNF hlutna” tih hman tum a ni.
Reels insiamsiakah hian pakhatna in Rs. 30000, pahnihna Rs. 20000, pathumna Rs. 10000 a ni a; essay ziah inelnaah hian pakhatna Rs. 50000, pahnihna Rs. 30000, pathumna Rs. 10000 a ni.
Kum 1961-a MNF dintute chu thalai an ni tih Zodinpuia hian sawiin, “Vawiin thlengin MNF chuan thalaite ngaihpawimawh berah a la nei reng a. 2018 MLA inthlana thalaite puala MNF-in manifesto point 11 a siam kha tihhlawhtlin vek a ni,” a ti. Vawiin thlenga kan sakhua leh kan hnam humhima a awm chhan chu MNF a ni tih a sawi.
MNF leh India kum 20 an indo hnua MNF-in silai a tun chhan chu Mizo mipui leh kohhran ngenna vang a ni a. India sawrkar pawhin MNF lakah intiamna chi hrang hrang a neih thu an sawi. MNF-in ralthuam an dahthat hun chhung tur chu kumkhua atan a ni lo, tiin, India rama kan hnam a him chhung atan leh an thutiama India a rinawm chhung atan chauh a ni tih a sawi. Mizo hnam hla chu “Jana Gana Mana” niloin, “Ro min rel sak ang che” tih a nih thu a sawi bawk.
Nationalism campaign rel “MNF hi Mizo thalaite tan”
