Youth 20 Mizoram programme kharna inkhawm nimina neihah khuallian chief minister chuan, nationalism chu hnam dangte va huat te, va ngaihtheih loh te lam ni lovin, Pathianin min pek ram leh hnam humhalh a, dinchhuahpui hi a ni a, mi tin mawh a nih rualin thalaiten mawhphurhna pawimawh em em kan nei, tiin thalai rual hmaah a sawi a. ‘Youth 20 Mizoram’ thupui atan hian “Nationalism, Patriotism & Development” tih hman a ni.
He Youth 20 Meet hi Aizawl district-ah tum nga leh district dangah tum 10 neih a ni a. Ram leh hnam enkawl hna thawk tur kan ram thalai rual inbuatsaih mekte hnenah, ‘nationalism, patriotism leh development’ chungchang uar taka sawi hi tihmakmawh a ni. Mihring mihrinna kawngah hian, mahni rilru puakchhuaka a nachang hriaa tih tumna nei hi chu a tlem zawk daih kan nih a rinawm a, a tam zawk fe hi chu inhrilh a, inzirtir a, thiam loh leh hriatloh inzirtir mawlh mawlh ngai kan nih a rinawm. Chuvangin, tun aia nasa zawka ram leh hnam hmangaih dan leh a pawimawhnate kan inhrilh a, kan inzirtir hi kan ram dinhmun hian a mamawh hle niin a lang.
‘Kan ramah eirukna a hluar’ tih hi ram hruaitute, kohhran hruaitute leh political party hrang hrang hruaitute leh pawl hrang hrang hruaitute hian sawi chikah an nei vek mai a. Eng vanga eirukna chu hluar em em reng nge a nih? tih zawhna hi, nakin lawka ram kaihhruai hna thawk tura kan chher hriam mek thalaite zawhna ni ta se, ram rawngbawl hna thawk mek (politician-te leh sawrkar hnathawkte) hian eng tin nge an chhan tak ang le? Eirukna hi khawi atanga intan thin nge a nih? tih zawhnate hi thalaite hnenah hian a chhanna kan pek a ngai dawn a. Eirukna a hluar kan tih hian heng ‘nationalism, patriotism leh development’ te hi kan ramah hian a taka nunpuitu hi kan awm mang ta lo em ni? tiin a inzawh theih bawk awm e.
Tuna thalaite hian, nakin lawkah tuna ram kaihhruai hna chelhtute dinhmun hi an rawn luah ve leh dawn a ni a, a thua an hriat nationalism hi a taka hmang thei tura tun atanga an rilru leh ngaihtuahnate her dik hi a pawimawh takzet a ni.
Nationalism leh keini…
![](https://theaizawlpost.org/wp-content/uploads/tap_logo-min-large.jpg)