US President Joe Biden chuan Russian in missile hmanga a beihna laka a inven theih nan air defence system panga a pek tur thu Washington DC a Nato leader te hnenah a sawi.
Nato summit hawnna a thusawina a neihah President Biden chuan Russia leh Ukraine indo mekna karah Nato military alliance chu hun dang zawng aia thiltithei tia sawii hun pawimawh an tawng mek tiin a sawi bawk a.
Biden chuan US chuan Germany, Italy, Netherlands leh Romania te nena thawkhovin Patriot missile batteries leh system tul dang te chu Ukraine hnenah an pe dawn tiin a sawi a.
Tun hnai lawkah Russian missile kahchhuah chuan Ukrainian capital Kyiv a children hospital deng fuhin Kyiv mayor chuan indona chhuah hnua an thiltawn rapthlak ber pakhat tiin a sawi nghe nghe a ni.
Thawhtanni khan Russia chuan Ukraine hmun hrang hrang missile hmanga a beih avangin nunna chan 43 lai an awm a ni.
President Volodymyr Zelensky chuan Ukraine in air defence supply a dawn theih nan Western allies te chu a thla a thla bia in a sawipui tawh a.
Tihian Nato chuan Ukraine hnenah strategic air defence system panga leh strategic anti-air batteries te chu a pe dawn ta a ni.
“Indona hi Ukraine chu independent ram zalen a nihna angin a tawp ang” tiin Biden chuan a sawi a, “Russia a chak lo vang a, Ukraine a chak zawk ang” tiin a sawi bawk.
Biden hian minute 13 chhung thusawina a neihah a aw a fiahin a sawifiah hle a, thla kaltaa Trump nena an debate a a nawi ang nen chuan a in ang lo hle.
Biden thusawi hi ram pawna US thawhpui te leh ram chhunga Donald Trump nena an inkhinnaah chakna a chang thei tih lantirna ang hawi zawnga ngaihsak theih niin Biden chuan ‘autocrats’ te chuan global order thlak danglam an tum a ni a ti bawk.
Hetih lai hian congressional Democrtas te chuan biden leadership chungchang sawihona an nei tia sawi niin Democrats te chu Biden lakah an phur vak lo tiin lawmaker te chuan an sawi thu Associated Press news agency chuan a tarlang a.
Thawhlehni pawh khan House of Representatives Democrat Mikie Sherill chuan vantlang hriatah Biden chu president chuh nawn lo turin a ngen bawk.
US tlawh mek diplomats te pawhin Biden hmalam hunah beiseina an nei chau an ti bawk a. “Debate neih hnuah kha chuan let leh theiah kan ngai lo” tiin European envoy pakhat chuan a sawi thu Reuters news agency chuan a sawi a. “Kum li dang US leh Nato kaihruai leh tur chuan ka ring lo a ni” a ti niin tarlan a ni.
Hetih lai hian kum 81 a upa ni tawh Biden team te chaun presidency demands phurzo turin a la tha tawk an ti thung a. White House chuan Biden leadership hnuaiah Nato chu tihzauh niin Finland leh Sweden te pawhin an zawm ve tawh an ti bawk.
Nato member ram 32 a hruaitu lawk te chu US capital ah summit neiin an awm mek a. An zingah hian UK Prime Minister thar Sir Keir Starmer pawh a tel a ni.
Sir Keir Starmer chuan Nato summit chu Russian president Vladimir Putin lakah Nato allies te chuan inlungrual takin chet la el dawnin Russian huangtauna lakah Ukraine an thlawp tlat dawn tih lantirna a ni tiin a sawi.
US President Joe Biden chuan Nato Secretary General Jens Stoltenberg chu America a civilian chawimawina sang ber Presidential Medal of Freedom a hlan bawk.
Thawhleh khan kum 78 a upa Trump chuan Doral, Florida a campaign a neihnaah Nato allies te chu a sawisel thung a. Trump chuan Nato member te chu gross domestic product atanga defence atana 2% tal hmang tura tihna an zawm loh avangin a sawisel nasa thin a ni. Mahse, Russia-in Ukraine a run hnuah Nato ram tam zawk te chuan defence ah 2% an dah tawh thung.
Nato-in Ukraine hnenah air defence system pe dawn
