NATO member te chuan Ukraine in Russia a beihlet theih nan puih zui zel an tum thu sawi chiangin tun hnaiah Khawthlang ram tena an thlawp that tawk loh chuan Ukraine chuan lohtheihlohin Russian president Vladimir Putin chu biakrem an tum ang tih hlauhna a awm a ni.
“Russia huangtauna an danna kawngah Ukraine kan thlawpna chu tihchak zel kan remti a ni” tiin U.S. Secretary of State Antony Blinken chuan Brussels a NATO foreign minister meeting neihnaah a sawi a.
Russia-in a run hnuah US chuan Ukraine hnenah security aid $40 billion chuang hu a pe tawh a, a tul chhung a puih tur thu a lo sawi tawh bawk.
Mahse hardline Republicans te chuan Ukraine thlawpna pek chungchangah sawi nawi an neih avangin US-in tanpuina a pek hma lam hun chu sawi chian theih a ni lo.
NATO Secretary General Jens Stoltenberg chuan US chuan Ukraine chu ralthuam a pek zui zel a beisei tlat thu a sawi a. “United States tana tul leh tha a ni a, kan inremna ang a ni bawk,” tiin Stoltenberg chuan a sawi.
Stoltenberg chuan tun hnaiah Germany leh Netherlands te chuan 10 billion euros hu tanpuina an pek leh chuan NATO chu Ukraine chungchangah an la inlungrualna a pholang a ti bawk a.
“Frontline-ah thil inthlak danglam a nasa lo chungin Ukrainians te chuan Russian forces te channa nasa tak an thlen a ni,” tiin a sawi.
European Union pawhin Hungary in dodalna a neih karah Ukraine hun rei tak an puih theihna tura ruahmanna an siam pawh a buai det bawk a.
Germany Foreign Minister Annalena Baerbock chuan Ukraine tanpui chungchang sawiin ‘sipai chakna lamah Ukraine-in hma sawn zel rawh se tihna lam a ni lo, mihring chhanhimna lam a ni zawk’ tiin a sawi.
French Foreign Minister Catherine Colonna pawhin Kyiv chuan tunah indo tirh ata vansang lama beihna nasa ber a tawk mek a ti bawk a.
“Ukraine kan thlawpna hi hun rei tak ngai tur a ni,” tiin a sawi bawk a.
Latvian top diplomat Krisjanis Karins pawhin Ukraine chuan ‘Russia logistic lama theihna te tibahlah turin long-range missile a mamawh a ni’ tia sawiin, “Russia indonaah a chak loha Ukraine indonaah a chak zawk hi kan vaia tana tha niin Ukraine kan thlawp a ngai a ni,” tiin a sawi ve thung.
Canada’s Foreign Minister Melanie Joly pawhin Ukraine-in a strategy a thlak a ngai tia sawina chu hnawlin, “Strategy tha tak kan nei a, Ukraine in startegy tha tak a nei a, a pawimawh ber chu a taka kalpui a ni” tiin a sawi.
NATO meeting hi Ukraine Foreign Minister Dmytro Kuleba pawhin a zawm ve dawn a, NATO member te chuan Ukraine in membership a neih theih nan ruahmanna siam an tem ti bawk.
Ukraine hian NATO member ram nih a ngiat a, mahse, US kaihhruai NATO chuan tun thlengin sawmna emaw a la pe duh rih lo thung.
NATO-in Ukraine puih zel tum
