University of Oxford-a mithiam ten zirchianna an neih atanga an hmuh danin naupan laia thei ei tam hian upat hnua hnute cancer risk a tihniam thei a, chutihrualin zu in ngai vak lo kum upat deuh hnua in thar leh te tan an zu in chuan hnute cancer risk a tisang lehzual niin an sawi.
Thei leh thlaihnah te hi hnute cancer veng theitu an ni tih chu mithiam te pawm dan a ni a, mahse, zirchianna hrang hrang neihtawhah chuan naupan laia thei eiin upat hnuah hnute cancer risk a tihhniam theih dan erawh a la tel ngai lo. Hei vang hian US-a mithiam te chuan nurse hnathawk mi 90,000, an naupan laia an thil ei thin tlangpui la hre thei te chu kum 20 chhung an zirchiang ta a ni.
He zirchianna atanga an hmuh danin naupan laia nitin thei pum 3 vel tal ei thin te chuan upat hnu (kum 35 hnulam)a hnute cancer neih theihna risk 25%-in a ei ve ngai lo te aiin an nei hniam zawk.
Naupan laia thei ei atan apple, balhla leh grape ei a tha lehzual a, chubakah kum 18 leh 25 inkar (early adulthood) velah serthlum leh kale (antam chikhat, a hnah kir nasa tak) ei tam ten hnute cancer risk hi a tihniam duh lehzual niin an sawi a, chutihrualin thei tui in erawhin nghawng a nei lem lo niin an sawi bawk.
Danish research team te chuan zu in danin hnute cancer leh lung (heart) lam natna nghawng a neih dan an zirchiang ve thung a, anni hian Denmark-a hmeichhe thihul tawh 22,000 te hriselna dinhmun an chhui bing ve thung a, chuta tanga an hmuh dan chuan hmeichhe zu in ten an in dan pangngai renga an in aiin, hmeichhiain kum 5 chhunga a zu in danah nikhatah no 2 a a intam belh chuan hnute cancer 30% in a tisang thei a, chutih rualin lung lam natna (coronary heart disease) risk chu 20%-in a tihniam ve thung.
Hetihrual hian hmeichhiain kum 5 chhungin a zu in thin zat a tihniam hian hnute cancer emaw coronary heart disease a neih theihna risk-ah engmah nghawng a nei lo niin an sawi bawk.
Hei vang hian zirchianna neitute chuan zu hian hnute cancer risk a tisang a, chutih rualin coronary heart disease risk erawh a tihniam ve thung niin an sawi a, mahse, ischaemic heart disease-ah zu in nghawng aneih leh neih loh erawh a la chiang chuang lo niin zirchianna neitute chuan an sawi bawk.
Zirchianna neitu te chuan tlem tlema zu in chuan eng emaw takin thatna a nei ve thei a, mahse, chu chu hnute cancer risk a tihsan leh theih si avangin a thatna aiin a that lohna a buk a rit zawk niin an sawi bawk.
He zirchianna chungchang hi Times of India health section atanga lakchhawn a ni.
Naupan laia thei ei tamin hnute cancer risk tihniam Kum upat deuh hnua zu in-in hnute cancer risk tisang
