Naupan laia TV en nasat lutuk vangin puitlin hnuah a cancer theih!
Naupangin TV a en nasat lutuk a, computer games leh internet a tui chilh vanga computer hmaah rei tak tak a thu thin a nih chuan a puitlin hnuah cancer theihna risk a sang bik niin mithiam ten an sawi.
Doctor-te chuan TV leh computer screen hmaa che chang lo leka naupang an thut veng veng reng hian a tithau uchuak thei a, chubakah an taksa hriselna atan kawng hrang hrangin a pawi thei niin an sawi a, chuvangin nu leh pa te chu an fate TV en dan leh computer khawih dan mumal taka hun bithliah sak turin an ti a, nikhatah darkar hnih aia rei lo chauh screen hmaa thutna hun siam sak tur leh, an la naupan deuh lai phei chuan TV pawh entir loh a tha niin an sawi.
Naupang TV leh computer hmaa thu chuah chuah chu an thau duh tih te chu mithiam ten an sawina a rei tawh, mahse, World Cancer Research Fund chuan thuchhuah siamin, naupang chuan exercise la tha viau pawh ni se, TV leh computer game a khelh nasat tho si chuan, a puitlin hnua a cancer theihna risk chu naupan laia TV leh computer screen hmaa thu nasa lo te aiin a sang zawk tho niin an sawi.
WCRF-a head of health information Kate Mendoza chuan, “Naupang chuan an school-ah te infiamna hun tam tak nei mah se, in lamah a chet ve leh si loh chuan a puitlin hnua cancer, diabetes leh lung (heart) natna neih theihna risk a nei sang a ni,” a ti.
Research agency Childwise-in a tarlan danin nikum chhung khan chawhrualin UK-a naupang pakhatin nitin TV leh computer hmaah darkar 5.9 vel hun a hmang niin an tarlang. Kum 10 vel kalta mai te kha chuan naupang 21% te chuan internet an la hmang ngai lo a, tunah chuan UK naupang zingah internet hmelhriat lo chu 1% chauh an ni ta.
Naupan laia TV en nasat lutuk vangin puitlin hnuah a cancer theih!
