Kum tling lo naupang/ tleirawl hna thawka chhawr leh dan loa sumdawnna atana hman – child adolescent labour leh child trafficking chungchang inzirtirna chu Thawhlehni khan Serchhipah neih a ni.
Hmanpuitu Serchhip bawrhsap Paul L Khuma chuan, dan kalha naupang kumtling lo hna thawka chhawr luih leh naupang hralha sumdawn (child trafficking) chungchangah Serchhip district-in case a la nei lo chu lawmawm a tih rualin, hetiang thil hi kan chungah leh kan khawtlangah a thlen ve lohna tura tan lak a tul a, a zirtir chhawngtu leh pu darhtu ni turin mitin kan pawimawh tih a sawi.
Naupang kum tling lo hnathawka chhawr chungchangah tum reng vang ni lo, hriatlohna avanga dan kalha naupang hnathawka chhawr a awm thei tih sawiin, India ram danin child labour a hrilhfiah leh a khap dan kalphung, inkaihhruaina leh hremna awm thei inzirtir nasat a ngai hle tih a sawi bawk.
Mizoramah April 2019 atanga June 2024 chhung khan child trafficking case 23 (hmeichhia 10 leh mipa 13) a lut tawh a. Serchhip district-ah erawh case a la awm lo.
Naupang kaihhnawih dan hriat tur pawimawh zirtir
