Global Youth Tobacco Survey-2 tarlan danin Mizoramah naupang kum 13-15 inkar 58% chuan vaihlo leh a kaihhnawih an khawih tawh a. National Family Health Survey-5 tarlan danin, Lunglei district bikah mipa puitling kum 15 chunglam zingah 75%-in vaihhlo leh a kaihhnawih an khawih a, hmeichhe puitling zingah 62%-in an khawih bawk.
Hei hi Lunglei district-a ‘Tobacco Free Youth Campaign 2.0’ tunhnaia neihah tarlan a ni.
Mizoram hi India rama vaihlo leh a kaihhnawih khawih nasa ber kan ni a, cancer thihpui tam tak hi vaihlo leh a kaihhnawiha inhnamhnawih nia sawi a ni bawk.
Tuna kumtling lo naupang kum 13-15 inkar, za zela 58-in vaihlo leh a kaihhnawih an khawih tan a nih chuan, kan hmabak hi a thim hle tihna a ni. Heti taka kumtling lo te, vaihlo leh a kaihhnawiha an inhnamhnawih nasat chhan hi, puitling lamin kan leklam nasat/uar vangah puh a nuam khawp ang. Naupangte hian an chenna leh an chhehvela thil thleng mek hi an hmuh tam a, an inchiahpiah reng na na na chuan, a tawpah an entawn a, an nunah an seng lut vat mai thin. Chuti a nih chuan, naupangten vaihlo an khawih chhan (factor) zinga lian tak pakhat chu puitling ten vaihlo kan khawih nasat vang a ni tihna a ni. Puitlingte hian naupang thang lian mekte hi nun kawng dik lovah kan lo hruai lut nasa hle tihna a nih chu.
Vaihlo that lohzia hi naupang atanga puitling thlengin kan inhrilh (awareness campaign) ngunin kan hre bel viau tawhin a rinawm a; chuti chunga naupang kum 13-15 inkar 58% zet maiin vaihlo an khawih a nih chuan, puitling lam hian mawhphurhna kan nei sang hle tihna a ni.
Naupang kum 13-15 inkar hi high school leh higher secondary school naupang an ni tlangpui a, chuti a nih chuan 58% zingah hian a tam zawk fe chu zirlai an ni tihna a ni a. Mizoramah hian hetiang rual hi chu school kal an ni deuh vek a, chhungkaw harsatna avanga zir zawm thei lo engemawzat awm bawk mah se, zirlai hi 50% vel chu an nih a rinawm.
Chuti a nih chuan, zirtirtute mawhphurhna a sangin a pawimawh ta hle tihna a ni. Khawtlang leh zirtirtute, nu leh pate nen thawhhona tha tak ruahman a nih loh chuan, 58% aia sang te hi kan ni chho mai ang tih a hlauhawm a. Vaihlo atanga ruihhlo danga luh hi thil awl tak a nih avangin, chhungkua, khawtlang, pawl hrang hrang leh sawrkar tanhona a pawimawh hle a ni.
Naupang leh Vaihlo
