Chhan hrang hrang avanga harsatna tawk naupangten phone hmanga puitu tur an koh theihna ‘Childline’ chu Mizoramah tangkai taka hman a ni tih Social Welfare minister Er Lalrinawma chuan a sawi.
Social Welfare minister hian zawhna chhangin, naupangte humhimna kawnga anmahni puih theihna tur – helpline number 1089 chu man chawi loa biakpawh theih a ni tih a sawi a. Kum 2016 July-a Mizorama hman a nih atanga kumin August thleng khan tanpui dila betu 14947 an awm tawh tih a sawi.
Women & Child Development hotute sawi danin, tanpuina dil naupang emaw an aiawha beitute hian inchhungkhura nu leh pa intihbuaina avangte, hursualna thil avang leh ngaihsaktu nei lo avangte chu biakpawh tamna ber a ni tih an sawi a. Heng hi a tul dan ang zelin a pui theitu tur ngaihtuah a, bawhzui an ni thin tih an sawi.
Tunhnai chhoah social media hrang hrang atangin Mizo hmeichhiaten an zahawmna humhim zo loin, saruaka inlan thin an tam thu minister hian a sawi a. Chutiang bawkin mahni ngam zawngte chunga hlei lenna ang chi pawh hmuh tur a awm chho ta tih sawiin, hengte hi a tlangpuiin an nu leh paten an fate ngaihsak that tawk loh vang a ni tih a sawi. Nu leh paten an fate kut an thlak nasat vanga thleng te pawh a awm tih sawiin, heng thil thleng hi a theih ang anga an bawhzui thu a sawi a ni.
Nu nau pai leh naupangte chaw tha pek leh an thanlen zelna tura sawrkar laipui leh state sawrkar ruahmanna hrang hrang chu tha takin an department hian an hlen thu Er Lalrinawma hian a sawi a. Zawhna chhangin, heng thil bika sawrkar laipui ruahmanna hrang chu an ni chuan an tihlawhtling tha tih a sawi a ni.
Naupang puih ngai pui theite biakpawhna hmang tangkai
