Mithiam ten zirchianna an neih tharah naupangin Vitamin D a tlakchham chuan type 2 diabetes a neih theihna risk a sang sawt niin an sawi.
A bik takin mi thau lutuk (obese) ten Vitamin D hi an tlachham duh hle niin mithiam te chuan an sawi a, vitamin D tlakchham hian lung lam natna (cardiovascular disease) leh type 2 diabetes risk hi a tisang thei niin an sawi.
Mithau ten vitamin D an tlakchham (deficiency) inzawm theih dan hi an la hrethiam bik chiah lova, zirchianna an hotu The University of Texas Southwestern Medical Center, Dallas a mi Micah Olson chuan, “Zirchianna kan neih atangin naupang vitamin D tlachham te hian insulin resistance an nei sang a. Kan zirchianna hian eng nge a chhan tih kan prove lova, mahse, vitamin D level kan taksaa a hniam hian type 2 diabetes neih theih risk a tisang tih erawh kan hre thei a ni,” a ti.
He zirchianna hi mi 411-ah kalpui a ni a, an taksa a vitamin D level, blood sugar level, serum insulin, BMI leh blood pressure te an teh vek a, an nitin ei leh in te leh an ei dan hunbi te pawh an teh vek a ni.
Micah Olson chuan, “Ei leh in lama fimkhur lo, a bik takin tukthuan (breakfast) ei loh mai mai ching te leh soda (pepsi, coca cola, fanta, etc kan tih ang chi) leh juice in nasa naupang ten vitamin D hi an tlachham tlangpui a ni,” a ti.
He zirchianna chungchang hi The Endocrine Society, Journal of Clinical Endocrinology and Metabolism (JCEM) ah tihchhuah a ni.
Naupangah Vitamin D tlakchham vangin diabetes risk a sang
