A pi leh pute a kah hlum hnuah Thai rawltharin Bangkok daia an sikulah mi panga vel a kap hlum a, amah pawh a inkap hlum zui a. Asia chhimchhak rama kum 2022 hnua inpawng thahna lian ber a tling.
Sikula a kah hlumte hi zirtirtu leh thawktu dangte an ni tih sawiin a kaptu kum 14 mi hi an zirlai tho niin a pu silai hmangin a mu 26 vel a kap a. Mu dang 34 a lo la kawm bawk tih police-in an sawi.
An khawpui hmarthlang dai, Debsirin Nonthaburi School-a inkahna a thlen hian naupangte chu an tlanchhe nasa hle a, hliam tam tak awmin ambulance-ah hlan an ni a, tap pawh an tam hle a. Thlalak thehdarhah chuan ambulance bula hlanga mi pakhat mu a lang a, damdawi thiamte che vel lai a lang bawk.
Police chuan mi 23-in hliam an tuar niin an sawi a, tun hnaia Thailand-a inkahna lian ber a tling a. Asia chhimchhakah hian a mi cheng zat mila mi malin silai kawl an tamna ber ram a ni tih Small Arms Survey chuan kum 2017 khan an sawi.
Education Minister Prasert Jantararuangtong-a chuan hetianga rawlthar a chet chiam chhan hi hriat a la ni lo va, an chhui nghal mek tih thuthar lakhawmtute a hrilh.
Tun hi Thailand-a sikula inpawng kahna a thlen vawi hnihna niin February khan chhim lamah zirtirtu leh zirlai kah hlum an lo ni tawh.
Emergency worker pakhat, Kiatikhun Verapongpradith-a chuan a hmun a thlen laiin silai a lo la ri tih a sawi a, a team-in an hnung, an awm leh bana hliam tuar naupangte an buaipui nghal tih a sawi a. Chhawng chung chhuatah mipa zirtirtu lo let an hmu a, pindan dangah zirtirtu hmeichhia, a awm leh a bana hliam tuar an hmu zui tih a sawi.
Silai puak hnuhnung ber a puah hnuah a kaptua an puh buaipui tur hian koh zui a ni tih a sawi a. “Hmanhmawh takin kan tlan a, silai hmet puaktu nia sawi hi a lu ding lamah amah a lo inkap a, a lo tlu a. Kan en chuan mar a lo la nei a, CPR kan ti nghal,” a ti.
Kum 2025 khan sikulah hian zirlai 3,100 vel leh zirtirtu 147 an awm tih district thuneitute chuan an sawi.
Thailand-a mi pakhat chauh chetna inpawng kahnaa thi tam ber chu kum 2022-a thleng kha niin police atanga bân pakhatin an ram hmarchhakah silai leh chem nen darkar thum chhungin mi 36 a that a. An zingah a nupui, a fapa leh daycare centre-a naupang 22 an tel.
Kum 2020 khan sipaiin Nakhon Ratchasima-ah bazarpui luhchilhin mi 29 a that a, nikum July khan mi pakhatin Bangkok bazarah vengtu leh khawlaia inphote telin mi panga a kap hlum a, amah a inkap hlum zui bawk.
Kum 2023 khan naupang kum 14 miin Bangkok-a bazar changkangah mi pahnih kap hlumin mi panga a hliam bawk a, police chuan online-a a lei handgun ssiam danglam a hmang niin an sawi.
Kum 2023-a inpawng kahna a thlen hnuah hetih laia interior minister, tuna prime minister ni ta, Anutin Charnvirakul-a chuan rei vak lo chhung silai license thar pek chhuah titawpin lak luh pawh a khuahkhirh a, kum 20 hnuai lamte silai kah zirnaa kal a khap bawk.
Silai neih tumte chu medical certificate neih ngaia tiin mental leh psychology lama an that dan tihlanna neih vek a ngai tawh a, license pawh dam chen neiin an ti bawk.
Thailand-ah hian civil miin silai maktaduai 10.3 vel an nei a, mi 100 zelah silai 15 vel awm zel ang a ni tih Small Arms Survey chuan a tar lang.
Naupangin a pi leh pu leh sikulah mi panga kap hlum
