State Level Unique Identification Implementation Committee Mizoram chu October 4 khan Aizawlah chief secretary Dr Renu Sharma kaihhruaiin neih a ni a. UIDAI Regional Office Guwahati deputy director general Commodore Dhiraj Sareen chuan a telpui.
Chief secretary chuan kum 5 leh kum 15 nih hunah mandatory biometric update (MBU) neih a pawimawh tih sawiin, School Education department chu school naupangten samkhai zawka biometrics an update zung zung theih nan school-a special MBU camp neih dan tur ruahman turin a hriattir.
UIDAI Regional Office DDG pawhin Mizoram sawrkar chu online birth registration number (BRN) kaltlanga naupang kum 5 hnuailam ziahluh zel tum turin a ngen a. Registrar-te chu nau piang hlimte an pian hnu lawkah Aadhar number pek chhuah nghal zung zung an nih theih nan Birth Registration Based Aadhar Enrollment (BRBAE) kalpui turin a chah.
Mizorama BRBAE kalpui a nih theih nan NHM Mizoram chu UIDAI hnuaiah registrar atan ruat a ni a. BRBAE hlawhtling taka kalpui a nih theih nan UIDAI chuan civil registration system (CRS) portal-a nau piangte ziahluh zung zung a nih theih nan state policy ruahman turin rawtna a siam a ni.
Thutkhawmah hian Aadhar chungchanga thu pawimawh sawiho a ni. Aadhar enrollment kalpui dante thlirho niin, MBU & BRBAE chungchang sawiho a nih bakah District Level Aadhaar Monitoring Committee hnathawh dan thlirlet a ni a, Aadhar hman dan chin pawh ngaihtuahho a ni.
Naupangte Aadhar number neih ran tir dan tur sawipui
