Mamit district Chhippui khuaa in kangah naute kum 4 mi a kan hnan hma in Lalbiakthangi (21) chuan a chhanchhuak a. An taksa lamah harsatna an nei zui lo tih thu dawn a ni.
The Aizawl Post-in Chhippui YMA hruaitute a zawhchiannaah, May 3 zan dar 6.30 pelh hnu khan Chhippui Vengchunga in, Jacob Laldinsanga te chhungkaw luah lai a kang a, an in hi a fal deuh avangin thenawmten an hre mai loa, in a kang tih an hriat meuh chuan thelh theih rual a ni lo. In neitunu hian an naute an pindanah a mu tih a sawi a, kang thelh tura chhuak zing ami Lalbiakthangi (21) d/o R Ramliana chuan luh dan a zawng nghal a, an kawngkapui lam hi a kan nasat tawh avangin luh theih rual a ni loa, dung aia sang mah tukverh te (feet hnih-khat bial) vel atanga inperh lutin tui taka lo la mu naute hi a la a, a luhnaah hian chhuahpui theih a nih loh avangin tanpuitu a au a, Lalbiakthangi nu hian tukverh lian zawk hnuaiah lo changin an la chhuak thei ta a ni.
Biakthangi chhuak leh lam tur hi tukverh a tet em avang leh a san deuh avangin a buai hle a, meikhu nen, a sa tawh bawk nen, engtin tin emaw bawkvak chhuakin tukverh atang hian a tla thla ta a, a chhuak thei hram tih sawi a ni. A chhuak tur hi a ke a tang a, a chapal a la chhuak thei loa, a kangral tel a, inchhung bungrua pawh engmah an chuh hman lo tih sawi a ni bawk.
YMA hruaitute sawi danin, Lalbiakthangi hi zuanzang, in fit tak a ni. Lehkha a zir tawh loa, a nu leh pate a tul anga in leh ram lama pui thin a ni. Nunna thapa midangte nunna chhan tura a huaisenna leh a inpekna hi YMA Chhippui Branch YMA ropui an tiin an chhuang takzet tih an sawi a ni. Pathiannia The Aizawl Post-in a biakpawhnaah Lalbiakthangi leh a chhanchhuah tak naute hian kangmei leh meikhu hipluhna leh an chhuahna lamah emaw an taksa lamah harsatna tawh zui an nei lo tih an lo hrilh a ni.
Naute leh a chhuanchhuaktu in taksa lamah harsatna nei lo
