NBA – Celtics in Heat an nihrual
Pathianni zing khan NBA Eastern Conference final game rukna khelh a ni a. Vawi hnih chak zawn tawh Boston Celtics chuan hnehna an chang nawn leh a, Miami Heat nihrualin, series-ah 3-3 a ni ta chiah. Thawhleh zingah NBA finals khel tur zawk tihchian a ni ang.
Final game hmasa pathuma tlawm zawn Boston Celtics in inlehthalna lian thlentir tumin hma lam an pan a, pathianni zingah point khat leka hnehna pawimawh an chan hmangin NBA record thar siam an hnaih lehzual. Final game sarihnaah an chak a nih chuan play-off ah 0-3 a hnufual thawh chunga hnehna chang let thei hmasa ber an ni ang.
Celtics hian Miami Heat lakah chak nawn leh ngei tumin tan an khawh a, game ruknaah tha taka bul tanin, quarter hmasa berah point ngain chungnung zawkah an tang nghal. Quarter hnihnaah an inhnehtawk lehzual a, inkhel hmuhnawm takah point khatin Heat an chungnung a, point lia hnufual chungin chawlhlawk an hmang.
Chawlhlawk hnu lamah inkhel a hmuhnawm lehzual a, chak tumin an innawr tawn nasa hle. Quarter thumnaah point thumin Celtics an chungnung zui leh a, point sariha hmahruai chungin quarter hnuhnung ber an hmachhawn. Quarter hnuhnung berah an inhnehtawk leh zual a, chak tur zawk hriatthiam har khawpin an inhnehtawk a, an inlehthal tawn zak zak. Miami Heat in hnehna changin NBA finals an lu ngei tura ngaih a ni hman a. Hun tawp hamrik a rik hma chiahin Derrick White chuan an khingpui lehthalna point hlu tak a thun a, point 104-103 in hnehna hlu tak an chang zui ta a ni.
Celtics in hnehna pawimawh tak an chan theih nan Jayson Tatum a chetha hle a, point 31 a thawhchhuah bakah ball sawhlet vawi 11 zet a dawng a. Jaylen Brown pawhin point 26 a thawhchhuah bakah ball sawhlet vawi 10 a dawng tling ve bawk.
NBA chanchinah play-off-ah 0-3 a hnufual tawh chunga hnehna chang let an la awm thei ngai lova, thawhleh zingah Celtics in Miami Heat an hneh leh thei a nih chuan NBA record thar siamin, play-off-ah 0-3 hnufual tawh chunga an khingpuite hneh let thei hmasa ber an ni ang.
NBA – Celtics in Heat an nihrual
![](https://theaizawlpost.org/wp-content/uploads/tap_logo-min-large.jpg)