Zirtawp zing khan NBA 2023-24 regular season khelh chhunzawm a ni a, Eastern Conference hmahruaitu Boston Celtics chuan an khingpui Phoenix Suns an hneh. Celtics hian Eastern Conference champion nih an hnaih deuh deuh zel. Zirtawp zinga inkhel dangah Oklahoma City Thunder chuan an khingpui Dallas Mavericks an hneh a, Western Conference table chung berah an kir.
Eastern Conference hmahruaitu Boston Celtic hi tunhnaiah vawi thum an chak zawn leh tawh a. Vawi li chak an chak zawnna ni turin Phoenix Suns chu point 127-112 in an hneh. Celtics hian Suns lakah an khel tha viau a, quater hmasa ber atangin inkhel hmuhnawm an lantir nghal. Quarter khatna atanga quarter thumna thlengin Celtics hi chungnung zawkah an tang a. Quarter hnuhnung berah point hnihin hnufual ve zeuh mah se an khingpuite lakah hian point 15 ngawtin hnehna an chang ta tho a ni.
Suns an hneh tum hian Celtics tan Jaylen Brown chuan point 37 a thawkchhuak. Jayson Tatum-a’n point 26 a thawhchhuah bakah Al Horford chuan point 24 a thawkchhuak ve bawk. Suns lakah hnehna an chan leh tak vangin Boston Celtics hi Eastern Conference champion an ni chiang thei tep tawh a. Conference champion la ni chiang chiah lo mah se playoff khel tur erawh chuan an tling chiang tawh thung.
Celtics hi season kal mekah an khel tha tluang viau a, vawi 52 zet an chak tawh a, tlawm zawkah vawi 14 an tang ve tawh bawk.
Zirtawpni zinga inkhel dangah Oklahoma City Thunder chuan an khingpui Dallas Mavericks chu point 126-119 in an hneh a, Western Conference table chung berah an kir leh.
Oklahoma City Thunders laka an tlawm tum hian Maverick player pawimawh Kyrie Irving chuan point 36 lai a thawkchhuak a, hei hi season kal meka point a thawhchhuah tam ber tum a ni. Thunders tan hian Shai Gilgeous-Alexander chuan point 31 a thawkchhuak a. Jalen Williams chuan point 27 a thawkchhuak ve bawk.
Oklahoma hian Western Conference-a an elpui lian Denver Nuggets chak zat leh tlawm zat (chak 42 leh tlawm vawi 20) an nihrual a. Champion lai lakah hian season kal mekahj 3-1 record an neih vangin table chung ber an luah theih phah thung.
NBA – Celtics in Phoenix Suns an hneh
